Klassıkalyq shahmattan elordada ótip jatqan álem chempıonatynyń matchtary aıaqtalýǵa jaqyn. О́tken aptanyń sońynda eki grossmeıster qatarynan eki oıyn ótkizip, ekeýinde de jeńimpaz anyqtalmady. 8-partııada Dın Lıjen aq tastarmen oınap, teń nátıjege qol jetkizse, 9-partııada Iаn Nepomnıashıı de aq tastarmen jeńiske jete almady. Degenmen, toǵyz partııadan keıin FIDE týy astynda óner kórsetip jatqan Nepomnıashıı jalpy esepte alda keledi – 5-4.
Shahmattan álemniń «Altyn táji» úshin ótip jatqan básekeniń kez kelgen partııasy grossmeısterler úshin asa mańyzdy ekeni belgili. Biraq, Astanadaǵy básekeniń segizinshi partııasy eki shahmatshy úshin sheshýshi kezeń edi. Sebebi eger bul partııada Iаn Nepomnıashıı jeńiske jeter bolsa, eki upaı basymdyǵymen jalpy esepte alǵa uzap, chempıondyqqa taǵy bir mańyzdy qadam jasaıdy. Al Dın Lıjen qarsylasynan basym túsken jaǵdaıda tarazy basy qaıta teńesip, jarys odan ári qyza túspek. Sondyqtan bul básekede qytaılyq shahmatshy jeńiske jetýge, reseılik grossmeıster barynsha jeńilmeýge tyrysyp baqty.
Dese de, segizinshi partııada aq tastarmen oınaǵan Dın matchty jaqsy bastaǵanymen, kezdesýdiń bel ortasynan asqanda qatelikke boı aldyryp, mańyzdy bir upaıynan qaǵyldy. Al Iаn qarsylasynyń mundaı «syılyǵyn» óz paıdasyna jaratyp, kezekti jarty upaıyn qorjynǵa saldy. Tórt jarym saǵatqa jalǵasqan segizinshi partııa 45-júristen keıin teń eseppen óz máresine jetti.
Segizinshi raýndtaǵy tartysty básekeden keıin eki oıynshy da toǵyzynshy partııada qarqynyn báseńdetip, asqan saqtyqpen oınady. Eki shahmatshy da bul kezeńde táýekelge barǵan joq. Nepomnıashıı aq tastarmen oınap, jalpy esepte alda tursa da tosyn qadam jasamady. Dın de ár júrisin uzaq oılap, qarsylasyna laıyqty jaýap qaıtaryp otyrdy. Nátıjesinde, shahmatshylar bul partııany alty saǵatqa jýyq oınady. Bul – ázirshe Astanadaǵy básekede tirkelgen eń uzaq partııa. Mamandar pikiri boıynsha, oıyn taǵdyry 50-júriste-aq sheshilip qoıǵan bolsa da, shahmatshylar bir-birine berilgisi kelgen joq. Sóıtip, match 82 júriske deıin jalǵasyp, grossmeısterler bul joly da upaı bólisýge májbúr boldy.
Toǵyzynshy partııadan keıin Nepomnıashıı jalpy eseptegi basymdyǵyn saqtap qaldy – 5:4. Keshe álem chempıony ataǵynan úmitkerler 10-partııasyn ótkizse, búgin 11-raýndta baq synaıdy.