Shaıbaly hokkeıden Qazaqstan ulttyq quramasy mamyr aıynda Latvııa men Fınlıandııada jalaýy jelbireıtin álem chempıonatyna daıyndyq jumysyn bastady. Ǵalym Mámbetalıev jetekshilik etetin qurama jahandyq doda aldynda oqý-jattyǵý jıynyn elordadaǵy «Barys Arena» muzaıdynynda ótkizip jatyr. О́tken senbi kúni Qazaqstan ulttyq quramasy Ońtústik Koreıa hokkeıshilerimen joldastyq kezdesý ótkizip, alǵashqy oıynda iri eseppen jeńiske jetti.
Báseke bastalǵan bette jerlesterimiz belsendi oıynymen kózge túsip, kedesýdi óz baqylaýynda ustaýǵa tyrysty. Al koreıalyq hokkeıshiler kerisinshe dóreki oınap, jıi-jıi ereje buzdy. Saldarynan birneshe oıynshysy muzaıdynnan qýyldy. Oıynnyń birinshi kezeńi el quramasynyń aıqyn basymdyǵymen ótse de, jerlesterimiz alǵashqy kezeńde bir ǵana shaıba soǵýǵa múmkindik aldy. Goldyń avtory – Roman Starchenko.
Úzilisten keıin el hokkeıshileri qarqynyn arttyryp, Koreıa quramasynyń qaqpasyn eki márte dál kózdedi. Aldymen 31-mınýtta Tamerlan Gaıtamırov mergendik tanytsa, araǵa úsh mınýt salyp Arkadıı Shestakov óz atyn tabloǵa jazdyrdy. Úshinshi kezeńde de jerlesterimiz jankúıerlerin qýantyp, qarsylastar qaqpasyna taǵy eki shaıba engizdi. Bul joly Dmıtrıı Grens (51-mınýt) pen Kırıll Polohov (59) nysanany dál kózdedi. Osylaısha, Qazaqstan quramasy Ońtústik Koreıamen ótken birinshi joldastyq kezdesýde 5:0 esebimen basym tústi. Eki qurama ókilderi búgin ekinshi joldastyq kezdesýin ótkizedi.
Statıstıkaǵa kóz júgirter bolsaq, Qazaqstan men Ońtústik Koreıa quramalary muzaıdynda buǵan deıin alty márte kezdesken eken. Onyń beseýinde jerlesterimiz basym túsken bolsa, 2017 jyldyń 23 sáýirinde birinshi dıvızıonnyń A tobynda Ońtústik Koreıa tuńǵysh márte Qazaqstan hokkeıshilerin 5:2 esebimen súrindirgen edi.
Latvııa men Fınlıandııada ótetin álem chempıonatynda el quramasy «V» tobynda Kanada, Chehııa, Shveısarııa, Latvııa, Slovakııa, Norvegııa jáne Slovenııa quramalarymen synǵa túsedi. Al 29 sáýir men 5 mamyr aralyǵynda Ulybrıtanııanyń Nottıngem qalasynda alaýy tutanatyn birinshi dıvızıonnyń «A» tobynda Ońtústik Koreıa hokkeıshileri Italııa, Ulybrıtanııa, Lıtva, Polsha, Rýmynııamen top-dıvızıonnyń jalǵyz joldamasyn sarapqa salady.
Qazaqstan ulttyq quramasynyń bas bapkeri Ǵalym Mámbetalıev álem chempıonatynyń aldyndaǵy oqý-jattyǵý jıynyna shaqyrtý alǵan hokkeıshilerdiń tizimin jarııalaǵan joq. Alaıda shaıbaly hokkeı federasııasy Ońtústik Koreıamen ótetin eki joldastyq matchtyń hattamasyna engen oıynshylardyń tizimin jarııalady. Bir qýanarlyǵy, osy eki matchta shaqyrylǵan hokkeıshilerdiń arasynda birde-bir legıoner joq. Barlyǵy Qazaqstan hokkeı mektebiniń túlegi.
Qaqpashylar: Djelal-Ad-Dın Ámirbekov, Nıkıta Boıarkın, Andreı Shýtov (bári – «Barys»), Maksım Pavlenko («Nomad»).
Qorǵaýshylar: Ádil Beketaev, Samat Danııar, Tamırlan Gaıtamırov, Emıl Nurǵalıev (bári – «Barys»), Danıl Býtenko, Mádı Dıhanbek, Artem Korolev, Abylaıhan Súleımenov (bári – «Nomad») Kırıll Polohov («Arlan»), Valerıı Orehov («Metallýrg», Magnıtogorsk).
Shabýylshylar: Álıhan Ásetov, Aleksandr Borısevıch, Dmıtrıı Gýrkov, Dinmuhamed Qaıyrjan, Nıkıta Mıhaılıs, Batyrlan Muratov, Mıhaıl Rahmanov, Kırıll Savıskıı, Ańsar Shaıhmeddenov, Arkadıı Shestakov (bári – «Barys»), Stanıslav Aleksandrov, Oleg Boıko, Abaı Mańǵysbaev, Maksım Mýhametov, Álıhan О́mirbekov (bári – «Nomad»), Saıan Danııar («Saryarqa»), Dmıtrıı Grens («Arlan»), Haqnazar Keńesbaı («Almaty»), Roman Starchenko («Spartak», Moskva), Evgenıı Rymarev («AKM», JHL).