Qazaqstan oqýshylary FIRST World Championship dúnıejúzilik chempıonatynda birden úsh nomınasııa boıynsha júldege ıe boldy. Jarys Amerıkanyń Hıýston qalasynda ótken, dep habarlaıdy Egemen.kz.
Oqý-aǵartý mınıstrliginiń habarlaýynsha, almatylyq 6 jastan 10 jasqa deıingi eń jas sanattaǵy Adeptus Mechanicus komandasy joǵary ynta-jigeri, yntymaqtastyq rýhy jáne ózara syılastyǵy úshin Core Values Award erekshe marapatyn ıelendi. Bastaýysh synyp oqýshylarynyń ınnovasııalyq jobasy men tehnıkalyq ázirlemeleri qatysýshylar arasynda eń úzdikteriniń biri boldy.
Play 4 Energy komandasy LEAS mektebiniń oqýshylary 10-16 jas aralyǵyndaǵy orta sanattaǵy Robot Design Award joǵary tehnıkalyq syılyǵyn qanjyǵasyna baılady. Olar kúrdeli tapsyrmalardy oryndaı alatyn berik jáne tıimdi robot jasaý arqyly tamasha baǵdarlamalaý jáne ınjenerlik daǵdylardy kórsetti.
12 jastan 18 jasqa deıingi joǵary sanattaǵy Motivate Award Finalist tóreshilerdiń erekshe marapatyna Almatynyń respýblıkalyq fızıka-matematıka mektebiniń AENTA komandasy ıelendi. Aıta keteıik, buǵan deıin oqýshylar tegin festıvaldar men trenıngter ótkizip, óz qurdastaryna robototehnıka men baǵdarlamalaý negizderin tanystyrǵan bolatyn.
«Oqýshylar tamasha nátıjeler kórsetip, elimizdi abyroımen tanystyrdy. Shákirtterimizdiń jeńisine qatysy bar barlyq janǵa alǵys bildiremiz! Bul Qazaqstandaǵy STEM damýyndaǵy jemisti joldyń basy ǵana», dedi USTEM Robotics qoǵamdyq qorynyń negizin qalaýshy Nurdáýlet Dosmaǵambet.
Aıta keteıik, robototehnıka boıynsha búkilálemdik chempıonatqa barlyǵy 36 myń bala qatysty. El namysyn 50-ge jýyq qazaqstandyq oqýshy qorǵady.