Astana qalasy polısııa departamenti Saryarqa aýdany PB krımınaldyq polısııa bóliminiń qyzmetkerleri alaıaqtyq jasady degen kúdikke ilingen 25 jastaǵy qala turǵynyn ustady, dep habarlady Egemen.kz Polisia.kz-ke silteme jasap.
Tergeý amaldary barysynda jigittiń Instagram áleýmettik jelisi arqyly ánshilerdiń konsertterine bılet satý maqsatynda jarnama ornalastyrǵany anyqtaldy. Osylaısha, áıgili ánshiniń merekelik keshine barmaqshy bolyp bılet satyp alǵan qala turǵyny, alaıaqqa 50 myń teńge aýdaryp jibergen. Alaıda, ol konsertke kelgende, bılettiń jalǵan bolyp shyqqanyn ańǵarǵan. Aldanǵanyn túsingen qyz polısııaǵa júgingen.
Tártip saqshylary ustalǵan azamattyń osyǵan uqsas aılamen birneshe elorda turǵynyn aldaǵanyn anyqtady. Atalǵan faktige baılanysty sotqa deıingi tergeý amaldary júrgizilip jatyr. Qazir kúdiktiniń osyǵan uqsas basqa da qylmystarǵa qatystylyǵy tekserilip jatyr.
Astana qalasynyń polısııa departamenti azamattarǵa saq bolýdy, aldyn ala tólem jasaýdan bas tartýdy jáne kórsetiletin qyzmetterdiń durystyǵyn tekserýdi eskertedi.