Búgin, 24 sáýirde «Egemen Qazaqstan» gazetiniń redaksııasynda Ázerbaıjannyń tanymal aqyny, Halyqaralyq «Alash» ádebı syılyǵynyń ıegeri Ákbar Goshalynyń shyǵarshylyǵyna arnalǵan kesh uıymdastyryldy, dep habarlaıdy Egemen.kz.
Is-sharaǵa Túrkııa eliniń azamaty, óner janashyry Iylmaz Okýklý men Selım Iýhaı qatysty. Kesh barysynda gazet basshylyǵy qonaqtarǵa basylymnyń tarıhy, qazirgi tynys-tirshiligi týraly baıandady. «Qazaq gazetteri» JShS Bas dırektorynyń birinshi orynbasary Vladımır Kýrıatov túrki áleminiń ádebıetin erekshe qurmetteıtinin aıtyp, qazirgi zamanǵy aqyn-jazýshylardyń shyǵarmalaryn, óleń joldaryn qazaq tiline aýdarýdy usyndy. Mundaǵy maqsat – túbi bir túrki elderiniń yntymaq-birligin nyǵaıta túsý.
Sonymen qatar, redaksııa qyzmetkerleri, aqyn-jazýshylar da óz eńbekterin túrik, ázerbaıjan tilderine aýdarýdy usyndy.
Ádebı kesh aıasynda Mádenıet salasynyń úzdigi, kúıshi Qaırat Aıtbaı qonaqtarǵa «Táttimbettiń shertpe kúıin» oryndady. Sonymen qatar, Abzal Maqash «Saǵyndym» ánin dombyramen tamyljyta oryndap, Jánibek Álıman, Dúısenáli Álimaqyn, Batyrhan Sársenhan, Aıtolǵan Júnishan Ákbar Goshalynyń óleńderin naqyshyna keltirip oqyp berdi.
Kesh sońynda sheteldik meımandar «aramyzdy Kaspıı qıyp jatsa da, qyl ótpeıdi» dep, ózderimen birge al kelgen syılyqtaryn tabystap, estelikke sýretke túsip tarqasty.
Aıta keteıik, Astanada ótken «Eurasian Book Fair-2023» kórme-jármeńkesi aıasynda aqyn, Halyqaralyq «Alash» ádebı syılyǵynyń laýreaty Ákbar Goshalynyń «Turannyń bir túp jýsany» atty kitabynyń tusaýy kesildi. Ataǵan kitapty aýdarǵan «Alash» ádebı syılyǵynyń laýreaty Tanakóz Tolqynqyzy: «О́mirde aqyndar kóp. Biraq týma adamdyq bolmysyn ómir boıy saqtap ótetin aqyndar az. Men Ákbar Goshalyny sol adamdyq bıik tuǵyrǵa qonǵan, ózi qandaı bolsa, óleńi sondaı mártebeli aqyndar sanatyna jatqyzamyn. Biz Ákbarmen erte kezden tanyssaq ta, onyń shyǵarmashylyǵy jóninde mardymdy dúnıe bilmeppin. «Turannyń bir túp jýsany» atty kitapty aýdarý barysynda Ákbardyń úlken aqyn ekenine kózim jetti», dep pikir bildirgen edi.