Atyraý oblysynda 300-ge jýyq medısına qyzmetkeri jetispeıdi. Onyń ishinde 183 dárigerdiń orny bos tur. Bul másele keıingi úsh jyldan beri oqtyn-oqtyn qozǵalǵanymen, áli tolyq sheshimin tappaı otyr.
Densaýlyq saqtaý mınıstri Ajar Ǵınııattyń aıtýynsha, qazir aýyldaǵy densaýlyq saqtaý salasyn jańǵyrtý jónindegi ulttyq baǵdarlama iske asyrylyp jatyr. Baǵdarlama aıasynda Atyraý oblysynda 2023-2024 jyldary 18 alǵashqy medısınalyq-sanıtarlyq kómek nysanyn salý kózdelgen. Onyń ishinde 11 medısınalyq, 6 feldsherlik-akýsherlik pýnkt, 1 dárigerlik ambýlatorııa bar. Al aýdandyq aýrýhanalarda qosymsha bólimsheler ashylyp, medısınalyq jabdyqtarmen jaraqtandyrý josparlanǵan.
«Bıyl jyl basynda Atyraý oblysynyń ákimdigi 280-nen asa medısına mamany, onyń ishinde 183 dáriger jetispeıtini týraly málimet berdi. Ásirese, akýsher-gınekologterge suranys artyp otyr. Sol sebepten óńirge kadrlardy kóbirek tartý úshin 2022-2023 oqý jylyna rezıdentýrada mamandar daıarlaýǵa 24 oryn berildi. Onyń ishinde eki akýsher-gınekolog mamany daıarlanady», deıdi atyraýlyqtarmen kezdesken A.Ǵınııat.
Onyń deregine súıensek, Atyraý oblysynda qan aınalymy júıesi aýrýlary, onyń ishinde ınfarkt, ınsýlt túrimen syrqattanýshylardyń kóptigi baıqalady. Buǵan ne áser etedi?
«О́ńirde medısınalyq-sanıtarlyq alǵashqy kómekti uıymdastyrýda kemshilik bar. Munyń saldary úıdegi ólim-jitimge sebep bolady. Insýlttan keıin «D» esebine alynǵan adamdardyń tómen úlesi 42,4%-dy qurap otyr. Al onkologııalyq dıspanserde de kadr tapshylyǵy bar. Bul dıspanserde sıtopatomorfolog, hımıoterapevt, medısınalyq fızık, torokaldy onkolog pen onkoýrolog sekildi arnaıy mamandar jetispeıdi», dep málimdedi A.Ǵınııat.
Atyraý oblysy