Astanada 1 mamyrda atap ótiletin Qazaqstan halqynyń Birligi kúnine oraı 70-ke jýyq is-shara ótedi. Elorda turǵyndary men qonaqtary úshin barlyq tórt aýdanda, ashyq alańdarda merekelik konsertter, sporttyq jarystar, ınteraktıvter uıymdastyrylady, dep habarlaıdy Egemen.kz qalalyq ákimdiktiń resmı saıtyna silteme jasap.
26 sáýir kúni saǵat 11:00-de Baıqońyr aýdanynyń belsendi uzaq ómir súrý ortalyǵynda «Qazaqstan – bizdiń ortaq úıimiz» atty merekelik aqparattyq-taqyryptyq kezdesý uıymdastyrylady. Bir saǵattan keıin osy ortalyqta Saryarqa aýdanynda «1 mamyr – kóktem men eńbek merekesi» atty konserttik baǵdarlama ótedi.
27 sáýirde Muǵalimder alleıasynda «О́nerli qol — baqytqa jol» jobasy aıasynda kitap kórmesi uıymdastyrylady. Sol kúni saǵat 11:00-de «Nurly júrek» áleýmettik qyzmet kórsetý ortalyǵy «1 mamyr - Qazaqstan halqynyń Birligi kúni» konserttik baǵdarlamasyn, al «Qamqor» ortalyǵy - «Bir shańyraq astynda» fleshmobyn ótkizedi.
28 sáýirde elordalyq Dostyq úıinde «Memlekettik til - qazaq tili elimizdegi turyp jatqan barlyq qazaqstandyqtardy biriktiretin kúsh» taqyrybynda dóńgelek ústel ótedi. Oǵan qalanyń etnomádenı birlestikteriniń ókilderi qatysady.
Elordanyń joǵary oqý oryndarynda bul kúni arnaıy taqyryptaǵy tárbıelik saǵattar, kvızder ótkiziledi.
«Sharapat» áleýmettik qyzmet kórsetý ortalyǵynda saǵat 11:00-de «Yntymaq, birlik, kelisim - eń basty baılyq el úshin» konserttik baǵdarlamasy, «Úmit» daǵdarys ortalyǵynda - «Kóńildi starttar» jarysy, «Jansaıa» ortalyǵynda balalarǵa arnalǵan konserttik baǵdarlama uıymdastyrylady.
Sonymen qatar 28 sáýirde Esil University-de Qazaqstan etnostarynyń salt-dástúrlerine arnalǵan konkýrs, E. Serkebaev atyndaǵy №3 balalar mýzykalyq mektebinde «Meniń elim - Qazaqstan» konserti uıymdastyrylady.
Sáken Seıfýllın murajaıy 28 sáýir men 3 mamyr aralyǵynda «Baqyt jolynda» kórmesine shaqyrady.
29 sáýirde Saryarqa aýdanynyń 25 jyldyǵyna jáne Qazaqstan halqynyń Birligi kúnine oraı elorda turǵyndary arasynda spartakıada ótedi. Jazýshylar alleıasynda etnomádenı birlestikterdiń, mádenıet jáne bilim berý obektileriniń qatysýymen merekelik baǵdarlama uıymdastyrylady.
Túrli is-sharalar 1 mamyrǵa josparlanǵan. Saǵat 11:00-de Jazýshylar alleıasynda ulttyq sport túrleri boıynsha jarystar ótedi. Al Trıatlon saıabaǵynda etnomádenı birlestikter men elshilikterdiń ókilderi saltanatty túrde aǵash otyrǵyzady. Munda kórme-jármeńke uıymdastyrylady.
Máselen, 1 mamyr kúni «Báıterek» monýmenti men qala alańynyń janyndaǵy alańda saǵat 12:00-de merekelik is-sharalar bastalady. Qonaqtarǵa arnap qala uıymdarynyń shyǵarmashylyq ujymdarynyń, memlekettik akademııalyq fılarmonııa ártisteriniń jáne otandyq estrada juldyzdarynyń qatysýymen konsert ótedi. Is-sharalar qalanyń aýla klýbtarynda, saıabaqtarda ótkiziledi. Bul kúni elordada sýburqaqtar iske qosylady.
Budan basqa, sporttyq-buqaralyq is-sharalardy EXPO halyqaralyq kórme ortalyǵynyń, «Atatúrik», «Kóktal» saıabaqtarynyń, «Qazaq eli» monýmentiniń mańynda ótkizý josparlanǵan. Qala turǵyndary ulttyq sport túrleri boıynsha, onyń ishinde asyq atý, armrestlıng, arqan tartý jáne gir kóterý boıynsha jarystarǵa qatysa alady.
Trıatlon saıabaǵynda sportsúıer qaýymdy merekelik marafon kútip tur.
Bul kúnderi aýdan ákimdikterinde kópbalaly analarǵa «Altyn alqa» jáne «Kúmis alqa» tósbelgileri tabystalady.