Túrkistan oblysy Arys qalasynyń turǵyny Altyn Quttybaıqyzynyń jasy 60-qa taıaǵan. 40 jyldan beri traktor tizgindep keledi. Áli kúnge deıin jan-júregi qalaǵan kásibimen aınalysqandy jany súıedi, dep jazady Egemen.kz otyrar.kz-ke silteme jasap.
Altyn Quttybaıqyzy 1980 jyly Shymkent qalasynda «poshta operatory» mamandyǵy boıynsha bilim alǵan. Keıin Tashkenttegi tehnıkýmda bilimin jetildiredi. Aýylyna kelgen soń mamandyǵy boıynsha jumys taba almaǵan ol 3 aılyq traktor júrgizý kýrsynan ótedi. Únemi ańsary traktorǵa aýa beretin keıipkerimiz nebári 21 jasynda K-700 traktorynyń júrgizýshisi bolǵan.
«Men traktor júrgizýdi úırenip kelip, jumysyma kirisken kezde traktor aıdaıtyndardyń bári shaǵyn deneli kisiler boldy. Sondaı kip-kishkentaı bolyp, úlken traktordy qalaı tizgindep júr dep tańǵalatynmyn. Sóıtsem, júrgizý op-ońaı eken. Munyń aýyr jáne jeńil júrgen kezde jyldamdyǵy basqasha bolady. Rejımmen júredi. Ony meńgerý úshin asqan jaýapkershilik kerek. Men basynda ýaıymdaǵanymmen, barlyq erejeni tez jattap aldym», dedi Altyn Quttybaıqyzy.
Kópbalaly ana KSRO zamanynda kúni-túni sovhozdyń jerin jyrtyp eńbek etedi. Keıin aýyldasyna turmysqa shyqqan eken. Ata-enesi traktor aıdaýyna qarsy bolmaǵan. Kelin bolyp túsken úıine traktorymen birge barǵandyqtan, «traktorshy kelin» atanypty. Úıdiń te, túzdiń de sharýasyn dóńgeletýdi ádetke aınaldyrǵan. Sovhoz tarap, jan-jaqqa bólingennen keıin bir traktor Altyn apaıdyń jeke úlesine tıedi.
«Bir traktormen bar bolsa, bir otbasyn asyraýǵa bolady. Baıaǵyda munyń tabysy jaqsy edi. Qazir basqa da aýyr kólikter shyqty. Biraq meniń áli kúnge deıin traktor aıdaǵym kelip turady. Sol úshin tapsyrys ala berem. Balalarym «Qoıyńyzshy endi, jasyń keldi ǵoı, úıde otyr» deıdi. Onda turǵan eshteńe joq, ózim jaqsy kóretin jumysymmen aınalysyp júrgenimdi aıtamyn. Bir jaǵynan jaqsy kóretin jumysymdy istesem, ekinshi jaǵynan qosymsha tabys tabamyn. Munyń nesi jaman? Shóp te oramyn, sý da, kómir de tasımyn. Qajetimizge jarap turǵan zatty paıdalaný kerek qoı. Sondyqtan eńbektený kerek», dedi Arys turǵyny.
Altyn Quttybaıqyzy traktordyń róline otyrǵaly qıyn da qyzyq esteligi kóp bolǵan. Solardyń birimen bólisti.
«Traktor aıdaıtyn qyzdar kóp emes qoı. Men alǵash traktor tizgindep júrgende jalǵyz emes edim. Qasymda Aqmaral degen qyz boldy. 1984 jyly ony kórshi aýyldyń jigiti alyp qashty. Sol kezde bul jańalyqty estı sala, traktormen qýyp barǵan edim. Traktordyń artynda úlken soqasy bar. Sol soqamen barǵam ǵoı. Ashýlanyp, topyraq joldy shańdatyp, qýyp barsam, qurbym «osy bosaǵada qalamyn» dedi. Ne isteı alasyń?.. Amal joq, baqyt tilep keri qaıttym. Biraq barǵan jeri ol qyzdy traktor aıdaýǵa qaıta jibermeı qoıdy. Sodan keıin men aýyldaǵy jalǵyz «traktorshy kelin» atandym», dedi ol.
Altyn Quttybaıqyzy 10 ul-qyzdy dúnıege ákelgen. Joldasy da súıikti isimen aınalysýyna tyıym salmaǵan. Sol úshin ómirlik jaryna aıtar alǵysy sheksiz. Kópbalaly ana poshtada da jumys istegen. 15 jyldaı ýaqyt aspaz da bolǵan. Tipti aýdandyq máslıhat depýtaty da bolyp, aýyldyń talaı máselesin kóterip, sheshilýine yqpal etken eken. Biraq báribir traktor rólinen bas tartpaǵan.