Pıreneı túbeginde tennısten «Masters» sanatyndaǵy «WTA 1000» týrnıri bastaldy. Madrıdtegi dodaǵa álemniń eń úzdik tennısshilerimen qatar elimizdiń de myqtylary qatysyp jatyr.
Jerlesterimizden birinshi bolyp týrnırdiń shymyldyǵyn álemniń 51-raketkasy Iýlııa Pýtınseva ashyp berdi. Otandasymyz Madrıdtegi jarystyń bastapqy kezdesýin dúnıejúzilik reıtıngte ózinen tórt saty tómen turǵan amerıkalyq Kler Lıýmen ótkizip, eki setke jalǵasqan matchta 6:4, 6:4 esebimen jeńiske jetti. Eki tennısshi buǵan deıin qańtar aıynda Aýstralııanyń Hobart qalasynda uıymdastyrylǵan týrnırdiń 1/16 fınalynda kezdesip, ol kezde de báseke Pýtınsevanyń aıqyn jeńisimen aıaqtalǵan – 6:2, 6:4.
Endi Iýlııa júlde qory 7,7 mln eýrodan asatyn týrnırdiń úshinshi aınalymyna shyǵý úshin álemniń 5-raketkasy fransııalyq Karolın Garsııamen kezdesedi. Tennısshiler kortta bir-birimen eki ret kezdesip, ekeýinde de jerlesimizdiń mereıi ústem bolǵan. Bir qyzyǵy, Pýtınseva men Garsııa sońǵy ret 2014 jyly sheberlik baıqasqan eken.
О́kinishke qaraı, erler arasyndaǵy básekeniń irikteýine qatysqan Tımofeı Skatov negizgi kezeńge shyǵa almady. Ol ıtalııalyq Marko Chekkınatodan jeńilip qaldy – 6:3, 2:6, 3:6. Al keshe Aleksandr Býblık kolýmbııalyq Danıel Elahı Galanmen sheberlik baıqasty.