Halyqaralyq fýtbol federasııalary qaýymdastyǵynyń basshysy (FIFA) Djannı Infantıno Astanaǵa arnaıy keledi. Bul týraly Qazaqstan fýtbol federasııasynyń baspasóz qyzmeti habarlady.
Resmı sapar 3 mamyrǵa josparlanǵan. Byltyr kúzde QFF prezıdenti Ádilet Barmenqulov pen FIFA basshysy Djannı Infantıno Fransııa astanasy Parıjde kezdesý ótkizip, fýtboldy damytýdy keńinen nasıhattap, daıyndyq júıesi men jarystardy uıymdastyrý, sonymen qatar Qazaqstanda fýtbol ınfraqurylymyn jaqsartý máselelerin talqylaǵan edi.
Halyqaralyq fýtbol federasııalary qaýymdastyǵy basshysynyń Qazaqstanǵa sapary aıasynda el aýmaǵynda FIFA qyzmetin damytý boıynsha halyqaralyq is-sharalardy uıymdastyrý máseleleri talqylanyp, sonymen qatar Ortalyq Azııa fýtbol qaýymdastyqtary arasynda yntymaqtastyqty arttyrý máseleleri qarastyrylmaq. Bul Djannı Infantınonyń Halyqaralyq fýtbol federasııasynyń basshysy retindegi Qazaqstanǵa alǵashqy sapary bolmaq.