Prezıdent Ulttyq qaýipsizdik komıtetiniń tóraǵasy Ermek Saǵymbaevty qabyldady. Memleket basshysyna tapsyrmalardyń oryndalý barysy, vedomstvonyń jyl basynan beri atqarǵan qyzmetiniń negizgi qorytyndysy men aldaǵy kezeńge arnalǵan jospary týraly málimet berildi, dep habarlaıdy Egemen.kz Aqordanyń baspasóz qyzmetine silteme jasap.
Ermek Saǵymbaev Ulttyq qaýipsizdik komıtetiniń bólimsheleri birqatar lańkestik qylmystyń, sonyń ishinde qoldan jasalǵan jarylǵysh qurylǵyny qoldaný arqyly halyq kóp jınalatyn oryndardyń birinde jasalmaq bolǵan terrorıstik aktige tosqaýyl qoıylǵany jóninde baıandady. Berilgen málimet boıynsha 19 adam qamaýǵa alynǵan.
Terrorızmge qarsy ortalyq shtabynyń jumysyn úılestirý kezinde terrorlyq qaterlerge qarsy is-áreket sharalaryn jetildirý úshin jattyǵý jıyndary men daıyndyq kesheni ótkizildi. Shet memleketterdiń arnaýly qyzmetteriniń barlaý áreketterine qarsy is-qımyl operasııalary júzege asyrylǵan. Anyqtalǵan birqatar fakti boıynsha sotqa deıingi tergeý amaldary júrgizilip jatyr», dedi UQK tóraǵasy.
Sonymen qatar, quqyq qorǵaý organdarymen birlese júrgizilgen krımınogendik jaǵdaıdy saýyqtyrý jumystarynyń nátıjesi týraly baıandaldy.
«Bıylǵy tórt aıda UQK 8 qaýipti uıymdasqan qylmystyq topty ustaǵan. Qarý-jaraq pen oq-dári jasaýǵa qatysty 7 jasyryn seh joıyldy. Zańsyz aınalymnan 268 qarý, 21 granata jáne 30 myńnan astam oq-dári tárkilendi. 16 esirtki laboratorııasynyń, 11 halyqaralyq jáne 17 óńirlik esirtki kanalynyń jumysy toqtatyldy. Memlekettik shekarany kúzetý salasynda 6 987 zań buzýshy ustaldy. Shamamen 2,8 mıllıard teńge kóleminde valıýta, altyn jáne basqa da taýarlardyń zańsyz tasymaldanýyna jol berilmedi. Sonymen qatar, qarý men oq-dárilerdi tasymaldaýǵa qatysty 85 árekettiń joly kesildi. Zańsyz kóshi-qon boıynsha 4 arnaǵa tosqaýyl qoıylyp, olardyń 6 uıymdastyrýshysy ustalǵan», dedi Ermek Saǵymbaev.
Ulttyq qaýipsizdik komıtetiniń tehnıkalyq bólimsheleri 37,9 mıllıonnan astam kıbershabýyldy jáne eldiń mańyzdy ınfraqurylym nysandaryna baǵyttalǵan 1948 DDoS-shabýylǵa toıtarys bergen.
Prezıdent Ulttyq qaýipsizdik organdary qyzmetiniń baǵyttary boıynsha birqatar naqty tapsyrma berdi.