Jambyl oblysynda tirkelmegen qarý-jaraq pen oq-dárilerdi satyp alý aksııasy júrip jatyr. Byltyr óńir turǵyndary polısııa qyzmetkerlerine 16 oıyq, 140 tegis uńǵyly jáne 4 travmatıkalyq qarý-jaraq ótkizip, jalpy somasy 10 401 948 teńge mólsherinde tólemaqy alǵan.
El kóleminde uıymdastyrylyp otyrǵan aksııanyń maqsaty aıqyn. Atalǵan is-shara arqyly qarýly qylmystardyń sanyn múmkinginshe azaıtýǵa vedomstvo tarapynan aıryqsha nazar aýdarylyp otyr. Tártip saqshylary keltirgen derekterge sensek, bes jyldyń bederinde elimizdegi qarýly qylmystardyń sany 50 paıyzǵa tómendegen. Aksııaǵa qatysýshylardyń qarasy bıyl da qalyń. О́ńirdegi zańsyz saqtalǵan qarý-jaraqty satyp alýǵa bıyl 10 mln 404 myń teńge qarjy qarastyrylyp otyr.
«Is-shara bastalǵannan beri óńir turǵyndarynan polısııa qyzmetkerlerine 9 ótinish kelip tústi. Jalpy somasy 900 myń teńgeden astam qarajatqa 12 atys qarýy men 3 patron tapsyryldy. Onyń ishinde 2 qarý – 6,5 mm kalıbrli tapansha jáne 5,6 mm kalıbrli myltyq. Odan bólek 10 tegis uńǵyly myltyq jáne 6,5 mm kalıbrli 3 patron bar», deıdi Jambyl oblysy polısııa departamenti ákimshilik polısııa basqarmasynyń erekshe tapsyrmalar jónindegi aǵa ınspektory, polısııa podpolkovnıgi Shýhratjon Iýldashev.
Keıingi jyldary turaqty túrde uıymdastyrylyp kele jatqan aksııaǵa belsendi qatysýshylardyń sany ýaqyt ótken saıyn sıreıtinge uqsamaıdy. Quqyq buzýshylyqtyń aldyn alýǵa arnalǵan is-shara jemisin berip otyr. Bir belgilisi, tirkelmegen qarýdy polısııa qyzmetkerlerine tapsyrǵan azamattar 34 myń teńgeden 345 myń teńgege deıingi aralyqta tólemaqy almaq.
Ishki ister mınıstrligi baspasóz qyzmetiniń habarlaýynsha, ótken jyly el turǵyndarynan 1400 atys qarýy men 10 myńnan astam oq-dári satyp alynypty. Zańsyz saqtalǵan qarýdy ótkizgen azamattarǵa jalpy somasy 89 mln teńge kóleminde tólemaqy tólengen. Al bıyl Qazaqstan azamattary qansha qarý-jaraq ótkizetini jyl sońynda naqtylanbaq.
«Zańsyz saqtalǵan atys qarýyn, oq-dárilerdi, jarylǵysh zattardy aqshalaı syıaqy úshin tapsyrýǵa nıet bildirgen azamat turǵylyqty jeri boıynsha polısııa bólimine ótinish bere alady. Syıaqylardyń mólsherin qurylǵan komıssııalar aıqyndaıdy. Erikti túrde tapsyrǵany úshin tólem kólemi qarýdyń túrine, onyń tehnıkalyq jaı-kúıine baılanysty jáne ár dana úshin derbes esepteledi. О́ńir turǵyndary osyny qaperden shyǵarmasa eken», deıdi Sh.Iýldashev.
Jambyl oblysy