«Ardagerler uıymy» respýblıkalyq qoǵamdyq birlestigi Ortalyq keńesiniń kezekti plenýmy ótti. Is-sharaǵa Ortalyq keńes tóraǵasy, Májilis depýtaty Baqtyqoja Izmuhambetov, Eńbek jáne halyqty áleýmettik qorǵaý mınıstri Tamara Dúısenova, Qazaqstan máslıhattary depýtattary birlestiginiń tóraǵasy Tóleýbek Muqashev, memleket jáne qoǵam qaıratkeri Jabal Erǵalıev, óńirlik ardagerler uıymdarynyń tóraǵalary qatysty.
Jıynda áńgime arqaýyna aınalǵan eń basty taqyryp – Prezıdent Qasym-Jomart Toqaevtyń «Ádiletti memleket. Birtutas ult. Berekeli qoǵam» Joldaýynyń oryndalýyna ardagerlerdiń yqpaly. Sońǵy bir jylda elimizde 5 iri saıası naýqan, atap aıtqanda referendým, Prezıdent saılaýy, Senat, Májilis jáne máslıhattar saılaýlary ótip, Jańa Qazaqstandy qurý jolynda mańyzdy da qajetti qadamdar jasalǵanyn tilge tıek etken Ortalyq keńes tóraǵasy Baqtyqoja Salahatdınuly el ardagerleri bul úderisterdiń bárine úmitpen qarap, qoldap otyrǵanyn jetkizdi.
– Shynaıy báseke oryn alǵan Prezıdent saılaýyna elmen birge ardagerlerimiz de atsalysyp, daýys berip, belsendilik tanytqanyna osy otyrǵan barshamyz kýámiz. Qasym-Jomart Kemelulynyń Ádiletti Qazaqstan qurý baǵytyndaǵy reformalaryn ardagerler biraýyzdan qoldap, halyqqa aǵalyq yqpal etip júr. Jaqynda Májilis saılaýy Prezıdentimizdiń reformalaryna sáıkes ótti. Barlyq partııalarǵa saılaýǵa qatysýǵa birdeı múmkindik berildi. Nátıjesinde, Májiliske saıası ustanymdary ártúrli 7 partııa ótti. «Amanat» partııasy usynǵan tizimmen maǵan Májilis depýtaty mandaty tapsyryldy. Ony ardagerler qaýymyna kórsetilgen zor senim dep qabyldadym, – dedi ol.
Qazirgi álemdik saıasattyń synaptaı syrǵyp, aýmaly-tókpeli bolyp turǵan ýaǵynda Memleket basshysynyń aınalasyna uıysyp, Jańa da Ádiletti Qazaqstandy birge qalyptastyrýǵa shaqyrǵan Májilis depýtaty eldegi birqatar ıgi ózgeris pen kezek kúttirmes problemaǵa toqtaldy. Máselen, jalaqy men zeınetaqyny ósirý, Eńbek jáne halyqty áleýmettik qoldaý mınıstrligi ázirlegen «Belsendi uzaq ómir» ulttyq jospary, qarııalarǵa arnalǵan gerontologııalyq medısına bólimshelerin ashý, olarǵa beriletin áleýmettik kómek, jumyspen qamtý, jastar tárbıesi, t.b. jaıttar týraly aıtty.
– Bıyl 2 aqpanda Prezıdent qabyldaýynda bolǵanymda birneshe usynys jasaǵan edim. Sonyń biri – «Iskerlik jáne janashyrlyq» jobasy. Qasym-Jomart Kemeluly usynystarymdy zor yqylaspen qabyldap, Úkimetke tapsyrma beretinin aıtty. Uzamaı, 6 aqpanda usynysym qabyldanǵany jáne osy jumystardy úılestirý Eńbek jáne halyqty áleýmettik qorǵaý mınıstrligine júktelgeni týraly jaýap aldym. Qazirgi ýaqytta usynysyma baılanysty joba jumysy Atyraý oblysynda bastalyp ketti. Nátıjesi – ýaqyt enshisinde, – dedi Baqtyqoja Izmuhambetov.
Eńbek jáne halyqty áleýmettik qorǵaý mınıstri Tamara Dúısenova el ómirindegi ardagerlerdiń orny erekshe ekenin atap ótip, alda kele jatqan Otan qorǵaýshy jáne Jeńis kúnderine oraı olarǵa memleket tarapynan kórsetiletin kómek týraly málimdedi.
– Jyldan-jylǵa maıdangerlerimizdiń sany azaıyp barady. Bıyl elimizde soǵysqa qatysqan 237 qarııamyz ǵana qalypty. Olardan bólek, 50 myńǵa taqaý tyń ardageri bar. Sonymen qatar ár salada eńbek etip, búginde el aǵasy bolar jasqa jetken sizderdiń de oryndaryńyz erekshe, – dedi mınıstr.
Jýyrda Prezıdenttiń TMD elderindegi tuńǵysh Áleýmettik kodekske qol qoıǵany belgili. Kúni keshe ótken Qazaqstan halqy Assambleıasynyń sessııasynda Memleket basshysy osy kodeks maqsattaryna keńinen toqtalǵanyn atap ótken Tamara Qasymqyzy jańa qujat el halqy úshin barlyq qoldaýlar tolyqqandy qamtylǵandyǵymen qundy ekenin jetkizdi.
– Bala dúnıege kelgennen bastap kámelet jasqa tolǵanǵa deıin balaǵa, ata-analarǵa, otbasyna qatysty, sonymen qatar zeınetkerlerge kórsetiletin qoldaý tetikteri de ol jerde jan-jaqty qarastyrylǵan. Bıyl 1 qańtardan bastap elimizdegi 6,3 mıllıon otbasynyń tolyq bazasy jasaldy. Olardyń qaısysynda qansha bala bar, kim qandaı kómekke muqtaj, qaı otbasynda múgedek balalar bar, kimge jumys kerek, osynyń bári bazaǵa engizildi, – dedi mınıstr.
Tamara Dúısenova bıyl ortasha zeınetaqy 125 myń teńgege óskenin, al eń úlken zeınetaqy 182 myń teńgeni quraıtynyn, sonymen qatar múgedek adamdarǵa beriletin járdemaqy jyl basynda 8,5 paıyzǵa ósip, Memleket basshysynyń tapsyrmasymen 1 shildeden bastap taǵy 14 paıyzǵa kóbeıetinin aıtty.
– Prezıdent óz Joldaýynda halyqtyń áleýmettik jaǵdaıyn, ómir súrý sapasyn jaqsartý máselesine toqtaldy. Shyn máninde, eń aldymen osy eldiń, halyqtyń qaýipsizdigi bolmasa, biz ómirdi jaqsarta almaımyz. Eldiń qorǵanys salasynda, áskerinde qandaı ózgerister bolyp jatyr? Qazirgi kúni 20 myńnan astam ardagerimiz bar. Solar eldi qorǵaý, qaýipsizdik salasyndaǵy jumystardyń jandanýyna qandaı úlesterin qosyp jatyr, men osy máselege toqtalǵym keledi, – degen general-leıtenant Abaı Tasbolatov qorǵanys salasynda jasalyp jatqan jumystar týraly baıandady.
Budan ózge, pleným barysynda Ulytaý oblysy ardagerler keńesiniń tóraǵasy Saǵyndyq Qojamseıitov, Qyzylorda oblysy ardagerleri keńesiniń tóraǵasy Serik Dúısenbaev sóz alyp, oı-pikirlerin ortaǵa saldy. Jıynda «Ardagerler uıymy» respýblıkalyq qoǵamdyq birlestigi Ortalyq keńesi quramyna tolyqtyrýlar men ózgerister engizildi.
Jıynda qabyldanǵan mańyzdy qujat – «Ardagerler uıymy» men Eńbek jáne halyqty áleýmettik qorǵaý mınıstrligi arasyndaǵy ózara yntymaqtastyq týraly memorandým. Qujatqa uıym tóraǵasy Baqtyqoja Izmuhambetov pen mınıstr Tamara Dúısenova qol qoıdy.
Is-shara sońynda Eńbek jáne halyqty áleýmettik qorǵaý mınıstrliginiń «Eńbek ardageri» medalimen Ulytaý oblysy ardagerler keńesiniń tóraǵasy Saǵyndyq Qojamseıitov, «Ardagerler uıymy» respýblıkalyq qoǵamdyq birlestiginiń «Qurmet belgisi» tós belgisimen Almaty qalasy ardagerler keńesiniń tóraǵasy Ahan Bıjanov, Aqtóbe oblysy ardagerler keńesiniń tóraǵasy Serik Shańǵutov, Batys Qazaqstan oblysy ardagerler keńesiniń tóraǵasy Maqsot Bergen, Qostanaı oblysy ardagerler keńesiniń tóraǵasy Batyrbek Ahmetov marapattaldy.