Bıyl – qazaqtyń qaıtalanbas kompozıtory, kúıshi Qurmanǵazy Saǵyrbaıulynyń týǵanyna 200 jyl. Osyǵan oraı Reseıdegi Astrahan oblysynyń dombyrashylary kompozıtordyń «Adaı» kúıin oryndap, Atyraý oblysyna chellendj joldady.
Reseılik dombyrashylar bul kúıdi Qurmanǵazy kesenesiniń aldynda tartty. Dombyrashylardyń arasynda eresekter de, balalar da bar.
«Bıyl qazaqtyń uly kompozıtory, kúıshi, dombyrashy Qurmanǵazy Saǵyrbaıulynyń mereıtoıyn atap ótemiz. Osyǵan oraı búgin biz – Astrahan oblysynyń dombyrashylary Atyraý oblysyna chellendj joldaımyz», deıdi Qurmanǵazy atyndaǵy óńirlik mádenı ortalyǵynyń dırektory Amangeldi Ábilǵazıev.
Qurmanǵazy Saǵyrbaıuly Reseı Federasııasyndaǵy Altynjar aýylynda jerlengen. Bul aýyl Astrahan oblysynyń Volodar aýdanynda ornalasqan.
«Altynjar aýylynda 2005 jyly Qurmanǵazy atyndaǵy óńirlik mádenı ortalyǵy ashyldy. Qazir atalǵan ortalyq Astrahan oblysyndaǵy mańyzdy mádenı jáne tanymal týrıstik nysandarynyń birine aınaldy. Bizdiń ortalyqqa alys-jaqyn shetelderden jyl saıyn 1000-ǵa jýyq adam keledi. Týrısterge Qurmanǵazy Saǵyrbaıulynyń, onymen zamandas bolǵan qazaqtardyń ómiri týraly maǵlumat beremiz» deıdi Amangeldi Ábilǵazıev.
Onyń aıtýynsha, ortalyqta uly kúıshiniń shyǵarmashylyǵy, ómiri týraly syr shertetin eksponattar qoıylǵan mýzeı men týrıster úshin qonaqúı ashylǵan. Ortalyqtyń Samal» qazaq mýzykalyq ansambli men «Belyı gorod» orys mýzykalyq ansamblinde 40-qa jýyq adam jumys isteıdi. Deni – qandastarymyz, arasynda 25 dombyrashy bar.