Jeńis kúni men Otan qorǵaýshy kúnine oraı elordada 50-den astam túrli is-shara josparlanyp otyr, dep habarlaıdy Egemen.kz Astana ákimdiginiń resmı saıtyna silteme jasap.
6-9 mamyr aralyǵynda elordanyń barlyq aýdanynda merekeniń basty rámizderiniń biri – estelik tósbelgiler men Jeńis lentalaryn taratý aksııasy ótedi.
8 mamyrǵa deıin Áskerı-patrıottyq mýzeıde oqýshylarǵa tegin ekskýrsııalar ótkiziledi.
Otan qorǵaýshylar kúnine oraı mektepter men kolledjderde erteńgilikter, biryńǵaı synyp jáne kýratorlyq saǵattar, «Otan úshin ot keshkender» áskerı qyzmetshilermen taqyryptyq kezdesýler uıymdastyrylady.
5 mamyr kúni «Demeý» qaıta áleýmettendirý ortalyǵy Otan qorǵaýshylar týraly fılm kórsetedi.
7 mamyrda merekelik konsertter «Báıterek» – «OTANYM – AMANATYM» monýmentiniń janynda - saǵat 18:00-den 22:00-ge deıin jáne Nomad City Hall - «Jeńis joly» ǵımaratynyń janynda saǵat 12:00-de ótedi.
Saǵat 15:00-de jáne 19:00-de Mýzykalyq jas kórermen teatry «Gaýhartas» mýzykalyq dramasyna shaqyrady.
7-9 mamyr aralyǵynda Úrker turǵyn alabynda №5573 áskerı bólimniń úrmeli aspaptar orkestriniń dalalyq ashanasy men konserti uıymdastyrylady. Osy kúnderi «Aqjol» aýla klýby aıtýly eki merekege oraı konserttik baǵdarlama daıyndap otyr.
8 mamyr kúni keshki saǵat 19:00-de Nomad City Hall-da kórermender D.Isabekovtiń «Tynyshtyq kúzetshisi» dramasyn tamashalaı alady.
2-10 mamyr aralyǵynda «Jansaıa» áleýmettik qyzmet kórsetý ortalyǵynda Jeńis kúnine arnalǵan ánder, óleńder men qolóner baıqaýy ótkiziledi.
5-8 mamyr aralyǵynda bilim berý uıymdarynda «Aramyzdaǵy ardager» chellendji iske qosylady. Al №50, 60, 80 jáne 52 mektepterde «Qandy soǵys týraly shaǵyn áńgimeler» atty tanymdyq dárister ótedi.
5 mamyr kúni saǵat 11:00-de «Úmit» daǵdarys ortalyǵynda Jeńis kúnine oraı tárbıe sabaǵy josparlanyp otyr. Saǵat 15:00-de belsendi uzaq ómir súrý ortalyǵy kórkemóner ujymdarynyń qatysýymen «Erlik izi óshpeıdi» konsertine shaqyrady.
7-9 mamyr aralyǵynda áskerı orkestr ardagerlerdi óz úıiniń aýlasynda Jeńis kúni merekesimen quttyqtaıdy.
Aıta keteıik, 8 mamyrda Astanada UOS ardagerleri men tyl eńbekkerleri úshin qala aýlalarynda dástúrli jyljymaly konsert uıymdastyrylady. Saǵat 18:00-de Qazaqstan OKZ sahnasynda Erkesh Shakeevtiń Eastwest in Astana mereıtoılyq avtorlyq konserti bastalady.
Sáken Seıfýllın murajaıynda 5-8 mamyr aralyǵynda Otan qorǵaýshy kúnine arnalǵan «El qorǵany - Ulandar» kórmesi, al 8-11 mamyr aralyǵynda Q.Qaısenovtiń 105 jyldyǵyna jáne Jeńis kúnine arnalǵan «Uly jeńis batyrlary jáne Qasym» atty ekspozısııa jumys isteıdi.
Jeńis kúni, 9 mamyrda «Otan Ana», Baýyrjan Momyshuly, Raqymjan Qoshqarbaev, Mánshúk Mámetova, Talǵat Bıgeldınov, Álııa Moldaǵulova, Ivan Panfılov eskertkishterine, Uly Otan soǵysynda qaza tapqan jaýyngerlerge arnalǵan monýmentaldy keshenge gúl shoqtaryn qoıý rásimi ótedi.
Keshki saǵat 19:00-de mýzeıde «CHANEL № 5» derekti dramasy usynylady. 14:00-den 17:00-ge deıin Esil jaǵalaýyndaǵy amfıteatrda «Otanǵa qyzmet - uly qurmet» konserttik baǵdarlamasy uıymdastyrylady. 9 mamyrda sportsúıer áýesqoılar Trıatlon parkindegi jeńil atletıka estafetasyna qatysa alady.
11 mamyr kúni keshke «Jastar» saraıynyń zalynda «Astana» estradalyq sımfonııalyq orkestri óner kórsetedi. 11 mamyr kúni saǵat 12:00-de «Ardager» halyq hory Belsendi uzaq ómir súrý ortalyǵynda «Biz bul kúndi este saqtaımyz» konsertimen óner kórsetedi.
17 mamyr kúni saǵat 12:00-de «Soǵysta da án shyrqalǵan» ádebı-mýzykalyq kompozısııasy ótedi, al 23 mamyr kúni saǵat 15:00-de tyl eńbekkerlerimen kezdesý uıymdastyrylady.
Esterińizge sala keteıik, Jeńistiń 78 jyldyǵyna oraı Uly Otan soǵysynyń ardagerleri men múgedekterine, áskerı is-qımyldaryna qatysýshylarǵa, Astanada turatyn tyl eńbekkerlerine birjolǵy tólem aýdarylady.
Sondaı-aq osy sanat úshin mamyr aıynda №8 emhanada tegin medısınalyq tekserýden ótý isi qarastyrylǵan. «Qamqorlyq mekenjaıy» aksııasy aıasynda olarǵa azyq-túlik sebetteri beriledi, aýlalary qoqystardan tazartylady.