Pandemııa bastalǵannan beri 13 800-den astam qazaqstandyq koronavırýs pen koronavırýstyq pnevmonııadan qaıtys boldy, dep habarlaıdy Egemen.kz QR Densaýlyq saqtaý mınıstrliginiń baspasóz qyzmetine silteme jasap.
DDU basshysy Tedros Adan Gebreıesýs álemdegi COVID-19 pandemııasyna baılanysty tótenshe jaǵdaı rejıminiń aıaqtalǵanyn resmı túrde málimdedi.
«Keshe Tótenshe jaǵdaılar komıteti óziniń 15-shi kezdesýin ótkizdi jáne maǵan halyqaralyq alańdaýshylyq týǵyzatyn densaýlyq saqtaý salasyndaǵy tótenshe jaǵdaıdyń aıaqtalǵanyn jarııalaýdy usyndy. Men bul usynyspen kelistim», dedi Dúnıejúzilik densaýlyq saqtaý uıymynyń basshysy Jenevadaǵy brıfıng barysynda.
T.Gebreıesýs pandemııa kezinde DDU-nyń baǵalaýy boıynsha koronavırýstan 20 mıllıon adam qaıtys boldy dep habarlady.
Qazaqstanda pandemııa jarııalanǵan alǵashqy kúnnen bastap vedomstvoaralyq komıssııa quryldy, onda 2 myńnan astam jedel jáne utymdy sheshimder qabyldandy. Komıssııa halyqtyń densaýlyǵyn COVID-19-dan saqtaý men qorǵaý, memlekettik organdardyń ózara is-qımyly, medısınalyq uıymdardyń ınfraqurylymyn nyǵaıtý, dárilik zattardy, ımmýnobıologııalyq preparattardy, medısınalyq maqsattaǵy buıymdar men jabdyqtardy, jeke qorǵaný quraldaryn satyp alý, eldegi jáne álemdegi epıdemıologııalyq jaǵdaıdy eskere otyryp, shekteý sharalaryn kúsheıtý jáne álsiretý máseleleri boıynsha sheshimder qabyldady.
Pandemııa bastalǵannan beri Densaýlyq saqtaý mınıstrligi men oblystardyń, Almaty, Astana, Shymkent qalalary ákimdikteriniń janynan respýblıkalyq jáne jedel shtabtar quryldy, olar kún saıyn koronavırýs ınfeksııasyna qarsy is-qımyl jónindegi medısınalyq uıymdardyń jumysyn úılestirdi.
Pandemııa kezeńinde QR Bas memlekettik sanıtarııalyq dárigeriniń COVID-19 máseleleri boıynsha sanıtarııalyq-profılaktıkalyq jáne epıdemııaǵa qarsy sharalar boıynsha 83 qaýlysy ázirlenip, qabyldandy, olar koronavırýs ınfeksııasynyń jańa nusqalarynyń paıda bolýyn jáne vırýstyń qasıetteri týraly bilimdi eskere otyryp, únemi ózekti bolyp otyrdy.
Ýaqtyly medısınalyq kómek kórsetý úshin qalalarda 16 modýldik aýrýhana salyndy jáne 3 ınfeksııalyq aýrýhana qaıta jańartyldy, sondaı-aq 63 ambýlatorııalyq-emhanalyq uıym paıdalanýǵa berildi.
Pandemııa kezinde úıde medısınalyq kómek kórsetetin 3054 kóshpeli mobıldik brıgadanyń jumysy bastaldy.
Psıhoemosıonaldyq júktemeni, qaýipterdi eskere otyryp, medısına kadrlaryn áleýmettik qoldaýdy qamtamasyz etý maqsatynda medısına qyzmetkerlerine ústemeaqy tóleý boıynsha sharalar qabyldandy. Pandemııanyń barlyq kezeńinde
57 myń medısına qyzmetkeri shamamen 285 mlrd teńge kóleminde túrli kovıdtik tólemder aldy.
Qazaqstandyq densaýlyq saqtaý júıesi resýrstarynyń, medısına qyzmetkerleriniń qajyrly eńbeginiń jáne KVI boıynsha profılaktıkalyq jáne epıdemııaǵa qarsy is-sharalardy ýaqtyly júrgizýdiń arqasynda ólimge ákeletin ınfeksııanyń taralýyn toqtatýǵa qol jetkizildi.
Búgingi tańda Qazaqstanda PTR oń nátıjesi bar 1 mln 411 myń adam jáne PTR teris nátıjesi bar 91 myń naýqas koronavırýs ınfeksııasymen aýyrdy. 2022 jyldyń tamyz aıynan bastap QR jáne barlyq óńirler jasyl aımaqta.
Sońǵy 3 jyldyń ishinde koronavırýs ınfeksııasynan 19 myń naýqas, onyń 13,8 myńy KVI+ jáne 5,4 myńy KVI- tan qaıtys boldy.
Naýqastardyń 99% saýyǵyp ketti.
DDU COVID-19 pandemııasyn 2020 jylǵy 11 naýryzda jarııalady. Nátıjesinde ol 3 jyl 1 aı jáne 24 kúnge sozyldy.