Prezıdent Qasym-Jomart Toqaevtyń Jarlyǵymen Ekinshi dúnıejúzilik soǵysta kórsetken erligi, batyldyǵy, janqııarlyǵy men soǵystan keıin memlekettik jáne qoǵamdyq qyzmetke belsendi qatysqany úshin semeılik ardager Ábdiǵalı Qaımoldınge «Halyq qaharmany» ataǵy berildi.
Memlekettik mańyzy aıryqsha marapatty Abaı oblysynyń ákimi Nurlan Uranhaev qart maıdangerdiń úıine arnaıy baryp saltanatty túrde tabys etti. «Halyq qaharmany» ataǵy men aıryqsha erekshelik belgisi – «Altyn Juldyz» ben «Otan» ordeni de zor qurmetpen tabystaldy. Sonymen qatar ardaqty ardagerge memlekettik qoldaý retinde 1,5 mıllıon teńgeniń sertıfıkaty men teledıdar tartý etildi. Odan bólek qart maıdangerge Prezıdenttiń atynan áskerı orkestr qurmet kórsetip, «Jeńis kúni» ánin shyrqady.
Ábdiǵalı Qaımoldın 1921 jyly 30 maýsymda burynǵy Semeı oblysy, Abyraly aýdany Uzynbulaq aýylynda dúnıege kelgen. Mektep bitirgen 1941 jyly Abyraly aýdandyq áskerı komıtetine ásker qataryna shaqyrylyp, Otan qorǵaýǵa attanady. Alaıda jıyrmadaǵy jalyndap turǵan jas áskerı jattyǵý alańyna emes, naǵyz maıdannyń ortasyna túsken edi. Otty jyldar jaıynda qart maıdangerdiń ózi: «Semeı qalasynda general-maıor Kırzımovtiń basshylyǵymen 105-dıvızııa quryldy. Dıvızııa quramynda biryńǵaı semeılik balalar boldyq. Aldymen bizdi О́skemenge, odan ári Jambylǵa, sodan keıin Gorkıı oblysynyń Gorohoveskıı lagerine jiberdi. Lagerde arnaıy jattyǵýdan ótip, ári qaraı birden maıdanǵa attandyq», dep eske alady.
Ol nebári 17 jasynda maıdanǵa attanyp, Ekinshi dúnıejúzilik soǵysty túgel ótkergen. Ardager aýyr shaıqastarǵa qatysyp, tórt ret jaralanǵan. Harkovty azat etýde, Stalıngrad túbindegi shaıqastarda eren erlik kórsetken.
1941-1945 jyldyń 9 mamyry aralyǵynda Stalıngrad, I Ýkraına, I Belarýs, III Baltyq maıdandaryndaǵy shaıqastarǵa qatysqan. 1946 jyldyń maýsym aıynda maıdannan oralǵan soń, partııada jáne memlekettik organdarda basshylyq qyzmette bolǵan. Atap aıtsaq, KOKP Semeı oblystyq komıtetinde, sodan keıin Jańasemeı, Novopokrovka aýdandarynyń atqarý komıtetinde basshylyq qyzmet atqarǵan.
1977-1982 jyldary «Túrksib» keńshary partııa komıtetiniń hatshysy qyzmetin abyroımen atqaryp, qurmetti demalysqa shyqty.
«Qyzyl Juldyz» jáne I dárejeli «Otan soǵysy» ordenderimen, «Jaýyngerlik eńbegi úshin», «Kenıgsbergti alǵany úshin», «Germanııany jeńgeni úshin» medaldarymen marapattalǵan.
Ǵasyrdan astam ǵumyr keshken soǵys ardageri Ábdiǵalı Qaımoldın 102 jasta. Amandyq bolsa, maýsym aıynda 103 jasqa tolatyn qart maıdanger alty bala tárbıelep ósirgen. Balalarynan 10 nemere, 12 shóbere súıip otyr.