Túrkistan oblysynda 8000 astam sheteldik kólik zańdastyrylyp, qazaqstandyq nómir aldy, dep habarlaıdy Egemen.kz oblystyq polısııa departamentine silteme jasap.
Ákimshilik polısııa basqarmasynyń bastyǵy Almas Tastanbekovtyń aıtýynsha, óńirde sheteldik kólikterdi zańdastyrýǵa 14 306 azamat ótinish bergen.
Búginde 8165 azamattyń kóligi tirkeldi. Al 1918 avtokólik ıesiniń qujattary keri qaıtarylypty.
Departament derekterine sáıkes, tirkeýge usynylǵan kólikterdiń basym bóligi Reseı Federasııasynan ákelingen. Odan keıingi orynda Armenııa, Qyrǵyzstan, Grýzııa, Ońtústik Koreıa, Latvııa kólikteri tur.
«Shetelden ákelingen kólikti tirkeý úsh mamandandyrylǵan halyqqa qyzmet kórsetý ortalyǵynda júrgizilip jatyr. Odan bólek, azamattar qujatyn onlaın tapsyra alady. Tirkeý úshin bastapqy tólem - 200 myń teńge», dep túsindirdi Almas Tastanbekov.