Memleket basshysy Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik Keńesiniń otyrysy ótti, dep habarlaıdy Egemen.kz Aqordanyń baspasóz qyzmetine silteme jasap.
Jıynda ekologııa jáne sý qaýipsizdigi máseleleri qarastyryldy.Ekologııa jáne tabıǵı resýrstar mınıstri Zúlfııa Súleımenova ekologııalyq qaýipsizdiktiń jaı-kúıi jóninde baıandama jasady. Sondaı-aq birqatar memlekettik organ basshylary men óńir ákimderi jekelegen máseleler boıynsha esep berdi.Prezıdent otyrys barysynda ekologııalyq qaýipsizdikke qater tóndiretin tabıǵı jáne antropogendik faktorlarǵa qarsy kúres asa mańyzdy ekenin atap ótti. «Sońǵy jyldary kóptegen eldiń úkimetteriniń belsendiligi artty. Ekologııany jaqsartý, «jasyl» ekonomıkaǵa kóshý jáne kómirsýtegi beıtaraptyǵyna qol jetkizý úshin batyl sheshimder qabyldanyp jatyr. Urpaǵymyzdyń deni saý bolyp, aýasy taza elde ómir súrgimiz kelse jáne memleketimizdi búkil álem moıyndaǵanyn qalasaq, biz olardan úlgi alýymyz kerek», dedi Qasym-Jomart Toqaev. Memleket basshysy ekologııa salasynda shuǵyl sheshim qabyldaýdy qajet etetin problemalarǵa basa nazar aýdardy.«Keńes kezeńinen kele jatqan kóptegen óndiris orny, kómir jaǵatyn elektr stansııalary men qazandyqtar ekologııalyq ahýaldyń nasharlaýyna ákep soqtyrdy», dedi Prezıdent.Budan bólek, jıynda qorshaǵan ortany qorǵaýǵa úlken jaýapkershilikpen qaraý jóninde birqatar másele kóterildi.Prezıdent oblystar men respýblıkalyq mańyzy bar qalalar basshylarynyń nazaryn ruqsat etilmegen jerlerdegi qoqystardy joıý jáne qoqys óńdeý kórsetkishteriniń tómen ekenine aýdardy.
Qasym-Jomart Toqaev kún tártibindegi máselelerdi qarastyrý nátıjesinde Úkimetke ulttyq ekologııalyq standarttardy álemdik standarttarǵa sáıkestendirý, óndiris oryndarynyń zııandy shyǵaryndylaryn azaıtý, qatty turmystyq qaldyqtardy qaıta óńdeý, ruqsat etilmegen jerlerdegi qoqystardy joıý jáne erozııaǵa ushyraǵan jerlerdi qaıta qalpyna keltirý jóninde birqatar tapsyrma berdi.Qaraǵandy oblysy Shet aýdanyndaǵy egistik alqaptaryn qalpyna keltirip, mal sharýashylyǵyn damytýǵaqatysty pılottyq jobanyń júzege asyrylý tájirıbesin elimizdiń ózge óńirlerinde qoldaný maqsatynda jan-jaqty zertteýge tapsyrma berildi.