Náresteniń betine aı sáýlesin túsirmeıdi. Aı sáýlesi betine tússe, ol aýrýǵa shaldyǵady.
Jańa týǵan balanyń kindigi qatqansha, kún batqannan keıin úıden kúl shyǵarmaıdy. Eger kúl shyǵarylsa, náresteiń densaýlyǵy nasharlaıdy.
Bala qyrqynan shyqqansha, túnde alyp júrmeıdi. Náresteniń betine aı sáýlesi túsýi múmkin.
Beıýaqytta balanyń kıimin dalaǵa jaımaıdy.
Balany ojaýmen ursa, yrys-nesibe ketedi.
Balany sypyrǵyshpen urmaıdy. Sypyrǵy tıgen bala jamanshylyqqa ushyraıdy.
Balaǵa úlken adamnyń aldyn kesip ótýge, úlkenderdiń sózine aralasýǵa bolmaıdy. Bul - ádepsizdiktiń belgisi.
Qyzdardyń uldardy tebýine bolmaıdy. Bul keleńsizdik bolyp esepteledi.
Dúnıege kelgen náresteniń kindigin aq baltamen kesip, taza jippen baılaıdy da, túbine kúl sebedi. Aq baltany ózge nársege paıdalanbaı, saqtap qoıady. Er balanyń kindigin úıkúshik bolmasyn dep, qyrdan asyryp laqtyrady. Al qyz balanyń kindigin úıdiń quty bolsyn degen yrymmen oshaq túbine kómedi.
Jańa týǵan sábıdi emizbesten buryn taza sýǵa malynǵan qasqyrdyń júnimen aýyzdandyrady. Erte kezde qasqyr kıeli sanalǵan, sondyqtan da bul yrym bala qasqyrdaı qaıratty da qajyrly bolsyn degen nıetten týyndaǵan.
Náresteniń uıqysy tynysh bolýy úshin jáne jyn-shaıtandy qýý maqsatymen adyraspandy otqa jaǵyp tútetip, balany bólerden buryn besigin aınaldyryp, alastap shyǵady. Bala bólengen besiktiń ústine jeti nárse (shapan, kebenek, ton, jabý, júgen, qamshy jáne besik kórpe) jabady.
Kebenek pen qamshy el qorǵaıtyn er bolsyn degendi bildiredi.
Ul balany qyryq kúnge jetkizbeı, 37-39 kúnde, al qyz balany qyryq kúnnen asyryp, 42-44 kúnde qyrqynan shyǵarady. Bul ul balanyń qalyńdyǵyna tóleıtin qalyń maly az bolsyn degen yrym.
Sábı shalqasynan jatyp, alańsyz uıyqtasa, elge belgili azamat bolyp ósedi, búk túsip jatsa, ýaıymshyl nemese jigersiz bolyp shyǵady, al etpetinen jatyp uıyqtasa, oıshyl bolady, eger aıaq-qolyn erkin sozyp uıyqtsa, bolashaq batyr, kemeńger bolady dep yrymdaǵan.
Qyz balaǵa shashy uzyn bolyp óssin dep jelke jegizedi.
Balanyń jelkesi shuqyr bolsa nemese jelkesinen súıse, qyrsyq bolyp ósedi dep yrymdaǵan.
Balanyń oraıy ekeý bolsa, eki ret úılenedi nemese qyzdyń oraıy ekeý bolsa, ekinshi ret turmysqa shyǵady dep yrymdaıdy.
Shóberesiniń alaqanynan sý ishken qart jumaqqa barady degen yrym bar.