Búgin Almaty oblysy, Talǵar aýdanyna qarasty, Jańalyq aýylynda saıası qýǵyn-súrgin qurbandaryn eske alýǵa arnalǵan mıtıng ótti. Is-sharaǵa solaqaı saıasattyń qurbanyna aınalǵan tulǵalardyń urpaqtary men zııaly qaýym ókilderi shaqyryldy, dep habarlaıdy Egemen.kz.
Jıynǵa Almaty oblysynyń ákimi Marat Sultanǵazıev, Saıası qýǵyn-súrgin qurbandarynyń urpaqtary Ahmet Baıtursynuly mýzeı-úıiniń jetekshisi, «Til – qural» oqý-ádistemelik, ǵylymı zertteý ortalyǵynyń dırektory Raıhan Imahambet, qazaqtyń kórnekti saıası jáne qoǵam qaıratkeri, alash qozǵalysynyń negizin salýshylardyń biri, Muhametjan Tynyshbaıulynyń nemeresi Tynyshpaeva Nursheken, qoǵam jáne memleket qaıratkeri Ydyrys Kóshkinovtyń shóberesi Ydyrys Darhan, shet elden kelgen tarıh ǵylymdarynyń kandıdaty, dosent Baıdildeev Jumagúl, Qyrǵyz Respýblıkasynyń «Ata – beııt» ulttyq tarıhı memorıaldyq kompleks dırektory Borombaev Ryskýl, tarıhshylar ári memlekettik komıssııa músheleri Ábjanov Hangeldi men Qoıgeldıev Mámbet jáne óńirlik saıası quǵyn-súrgin komıssııasynyń músheleri qatysty.
Taǵzym etýshiler eskertkishke gúl shoqtaryn qoıyp, marqumdarǵa quran baǵyshtady. Jıynda sóz alǵan oblys ákimi Marat Sultanǵazıev eske alý sharasynyń mańyzdy ári keleshek urpaq úshin qundylyǵy joǵary ekenin atap ótti.
«Qasiretti jyldardyń qurbandaryn aqtaý jumysy jalǵasýda. Bul rette oblysymyzda arnaıy komıssııa jumys istep jatyr. Komıssııa músheleri azamattardy aqtaý úshin arhıv qujattarymen jumys istep, «Qastek kóterilisi. 1928 jyl», «Imperııalyq-polıseılik qadaǵalaýdyń tarıhy», «Alataý óńiri: Alash qaıratkerleri», «1928: Múlikti tárkileý tarıhynan – Balqash aýdany» sııaqty qujattar jınaqtaryn shyǵardy. Tarıhtaǵy osyndaı qıyn kezeń birligimizdi berik, búgingi tirligimizdi tatý etetin faktor ekeni sózsiz», dedi ol óz sózinde.
Sonymen qatar, is-shara barysynda 2018 jyly jumysyn bastaǵan mýzeı ujymy túrli tarıhı eksponattardy qonaqtar nazaryna usyndy. Sondaı-aq «1928: Múlikti tárkileý tarıhynan – Balqash aýdany» jáne «Alataý óńiri: Alash qaıratkerleri» atty kitaptarynyń prezentasııasy ótti.
Tusaýkeser sóz alǵan repressııa qurbandaryn aqtaý boıynsha arnaıy qurylǵan memlekettik komıssııanyń múshesi, professor M.Qoıgeldıev: «Prezıdenttiń jarlyǵymen qurbandardy aqtaý boıynsha úlken jumys istelip jatyr. Atap aıtsaq, qazir 12 tomdyq qujattar jınaǵy daıyn boldy. Bul óte aýqymdy jumys. Qazaqtyń 20-ǵasyrdaǵy qasiretin tarıh betinde aıqyn qaldyramyz», dedi.
Jalpy Almaty oblysynyń aýmaǵynda 250 myń adam saıası repressııanyń qurbany bolyp, 15 myń adam atýǵa kesilgen. Al jazyqsyz jazalanǵan adamdardyń kópshiligi osy Jańalyq aýylynda, Qandysaı dep atalatyn jerde jerlengen.