Prezıdent Qasym-Jomart Toqaev Astana halyqaralyq forýmyna qatysýǵa kelgeni úshin Helga Shmıdke alǵys aıtyp, atalǵan forým Batys pen Shyǵys arasyndaǵy baılanystardy nyǵaıtýǵa yqpal etetin jańa alań ekenine nazar aýdardy, dep habarlaıdy Egemen.kz Aqordanyń baspasóz qyzmetine silteme jasap.
«Siz bastap kelgen EQYU delegasııasy osy forýmda kóptegen túıtkildi máselelerdiń oń sheshilýine eleýli úles qosady dep sanaımyn. О́kinishke qaraı, qazir álemde ondaı problemalar bar. EQYU-men yntymaqtastyqty nyǵaıtý Qazaqstan úshin basym baǵyt sanalady. Bizdi uıymnyń róli týraly pikirler qaıshylyǵy alańdatady. 2010 jyly Astanada ótken sammıtten keıin mınısterler deńgeıinde de, basqa formatta da birde-bir resmı qujat qabyldanǵan joq. Árıne, bul – alańdatarlyq jaıt. Biz uıym aıasyndaǵy baılanystardy nyǵaıtý qajet ekenine burynǵydaı kámil senemiz», dedi Qasym-Jomart Toqaev.
Prezıdenttiń aıtýynsha, Qazaqstan – EQYU-nyń belsendi múshesi. Prezıdent elimizdiń EQYU-men aradaǵy ózara tıimdi seriktestik jáne ashyqtyq rýhyndaǵy tyǵyz qarym-qatynasyn odan ári nyǵaıtýǵa jáne osy uıymnyń Bas hatshysy Helga Shmıdke jan-jaqty qoldaý kórsetýge daıyn ekenin málimdedi.
Helga Shmıd óz kezeginde Astana halyqaralyq forýmyna qatysýǵa shaqyrǵany úshin Qasym-Jomart Toqaevqa alǵys aıtty.
«Durys aıtasyz. Qazir kúrdeli kezeń dep oılaımyn. Qıyndyqtarǵa qaramastan, EQYU biregeı dıalog alańy retinde qyzmetin jalǵastyra beredi. Sondaı-aq Qazaqstannyń Eýropadaǵy qaýipsizdik jáne yntymaqtastyq uıymyndaǵy belsendi rólin oń baǵalaımyn. Siz Astana sammıti týraly aıtyp óttińiz. Men ol jıynǵa qatystym. Durys aıtasyz, bul sońǵy sammıt boldy. Astana deklarasııasy, shyn máninde, uıymnyń qyzmetin retteıtin mańyzdy qujattardyń biri. Men Astana forýmynda sóıleıtin sózińizdi asyǵa kútemin. Qazir mámilege kelý úshin bir-birimizdiń pikirimizge qulaq asý óte mańyzdy dep oılaımyn. EQYU-nyń negizi mindeti de – osy», dedi EQYU Bas hatshysy.
Kezdesýde Qazaqstan men EQYU arasyndaǵy yntymaqtastyqtyń qazirgi jaı-kúıi men onyń damý perspektıvalary talqylandy. Sondaı-aq aımaqtyq jáne jahandyq kún tártibindegi ózekti máseleler qarastyryldy.