Qandasqa arnalǵan biregeı karta

Eńbek jáne halyqty áleý­met­tik qorǵaý mınıstrliginiń máli­metinshe, «Ata joly» kartasyn shetel qazaqtaryna berýdegi maqsaty – tarıhı Otanmen baılanysty nyǵaıtý, olardyń áleýetin arttyrý úshin bizdiń elimizge kásipkerler men tabysty bıznesmenderdi tartý. Karta shetelde turatyn etnostyq qazaqtarǵa azamattyǵyn saqtaı otyryp beriledi. Sondaı-aq olar el aýmaǵynda 10 jyl merzimge turýǵa ruqsat alady.

«Ata joly» kartasy bar shetel qazaqtary basqa eldiń azamaty bola tura Qazaqstan azamattarymen jáne repatrıanttarmen teń quqyqqa ıe. Bul kartanyń múmkindikteri mol. Atap aıtqanda, medısınalyq kómek, áleýmettik tólemder men qyzmet kórsetý, Eńbek kodeksine jáne «Halyqtyń kóshi-qony týraly» zańǵa sáıkes el aýmaǵynda jumysqa ornalasý, Kásipkerlik kodekske jáne Qazaqstannyń ózge de quqyqtyq aktilerine sáıkes kásipkerlikpen aınalysýǵa, «Bilim týraly» zańǵa sáıkes memlekettik bilim berý uıymdarynda tegin orta bilim nemese joǵary oqý oryndarynda konkýrstyq negizde oqýǵa jáne jeke oqý oryndarynda aqyly bilim alýǵa, «Advokattyq qyzmet jáne zań kómegi týraly» zańǵa sáıkes memleket kepildik bergen zań kómegin alý, halyqaralyq shart­tarǵa jáne zańnamalyq qu­qyq­tyq aktilerine sáıkes jeńil­detilgen tártippen Qazaqstan Respýblıkasynyń azamattyǵyn alý quqyǵyn paıdalana alady», deıdi vedomstvo ókilderi.

Olardyń aıtýynsha, «Ata joly» kartasy bar shetel qazaq­tary tek memlekettik organdar men jergilikti ózin-ózi basqarý organdaryna saılaýǵa, saılanýǵa, respýblıkalyq referendýmǵa qatysýǵa quqyǵy joq jáne mem­lekettik qyzmetke kire almaıdy. Al «Ata joly» kartasynyń ıesi Qazaqstan azamattyǵyn alǵan jaǵdaıda onyń kartasy jaramsyz dep tanylady eken.

Resmı derekterge súıensek, 2023 jylǵy 1 maýsymdaǵy jaǵdaı boıynsha 8 034 etnostyq qazaq tarıhı Otanymen tabysyp, qandas mártebesin alǵan. Elimizge kelgen etnostyq qazaqtar negizinen Almaty (27,8%), Mańǵystaý (12,8%), Túrkistan (6,4%) jáne Jambyl (4,8%) oblystaryna, sondaı-aq Astana (10,7%), Almaty (8,8%) jáne Shymkent (7,1%) qalalaryna qonystanǵan.

Esterińizge sala keteıik, qan­dastardy qonystandyrýǵa eńbek kúshi tapshy óńirler anyqtaldy: Aqmola, Abaı, Qos­ta­naı, Pavlodar, Shyǵys jáne Soltústik Qazaqstan oblystary.

«О́ńirlerge qonystandyrý 2023 jylǵa arnalǵan qandastardy qabyldaý kvotasy 1 925 adamdy qu­raı­dy. 2023 jylǵy 1 maý­­­sym­daǵy jaǵdaı boıynsha óńir­­­lerge 787 qandas qonys aýdar­dy.­ Qandastardyń kelýi kóbeıgen kez­de ol aımaqtarda qabyldaý úshin kvota mólsheri ulǵaıtylýy múmkin. Joǵaryda atalǵan óńirlerde qonystanǵan qandastarǵa kóshýge sýbsıdııa túrinde memlekettik qoldaý shara­lary usynylady – bir mezgilde otaǵasyna jáne otbasynyń árbir múshesine 70 AEK (241,5 myń teńge) mólsherinde; turǵyn úı jaldaýǵa jáne kommýnaldyq qyzmetterge aqy tóleýge – bir jyl ishinde 15-ten 30 AEK (51,7-den 103,5 myń teńgege deıin) mólsherinde», deıdi Eńbek jáne halyqty áleýmettik qorǵaý mınıstrligi.