Memleket basshysy Abaı oblysyndaǵy tótenshe jaǵdaı kezinde jiberilgen qatelikter týraly aıtty, dep habarlaıdy Egemen.kz Aqordanyń baspasóz qyzmetine silteme jasap.
«Qostanaıda bolǵan órt kezinde men azamattyq qorǵaý jáne atqarýshy bılik organdarynyń tótenshe jaǵdaılarǵa naqty daıyndyǵyna tekserý júrgizýdi tapsyrdym.
Orman jáne dala órtin sóndirý úshin órtke qarsy tehnıkalyq qural-jabdyq qorlaryn qalyptastyrý tapsyryldy. Daıyndyq deńgeıi tómen ekeni anyqtaldy. Atap aıtqanda, materıaldyq-tehnıkalyq jaraqtandyrý kórsetkishi – 69%, fýnksıonaldyq ınfraqurylym kórsetkishi – 63%. Jalpy, ortalyq jáne jergilikti atqarýshy organdardyń tótenshe jaǵdaılarǵa daıyndyǵy – 70% (Tótenshe jaǵdaılar mınıstrligi – 75,1%, Ekologııa jáne tabıǵı resýrstar mınıstrligi – 59,5%, jergilikti atqarýshy organdar – 70,2%). Úkimet daıyndyq kórsetkishterin tótenshe jaǵdaılarǵa tıisti dárejede tótep beretin deńgeıge jetkizýi qajet», dedi Qasym-Jomart Toqaev.
Sonymen qatar Memleket basshysy jazdyń ystyǵy endi bastalǵanyn eskertip, ondaı kezde órtke tótep berý úshin daıyndyq saqadaı saı bolý kerektigin eske saldy. Osyǵan baılanysty Úkimet shuǵyl shara qabyldaý kerektigin de alǵa tartty.
«Álemde birde-bir memleket kóp kásibı órt sóndirýshini ustap tura almaıdy. Eriktiler otrıadtaryn tartý tájirıbesi keńinen qoldanylady jáne olardy oqytady, qural-jabdyqtarmen qamtamasyz etedi, saqtandyrý sharalary qarastyrylady. Bizde de bul normalar zań júzinde qarastyrylǵan. Biz bul resýrsty belsendi paıdalanýymyz kerek», dedi Memleket basshysy.
Sondaı-aq Prezıdent ormanǵa baryp, qaýipsizdik erejelerin buzǵan azamattardy qylmystyq jaýapkershilikke tartý kerektigin qadap aıtty.
«Orman alqaptaryna kelip, qaýipsizdik erejelerin buzǵan azamattardy qylmystyq jaýapkershilikke tartý kerek. Olar ot jaǵyp, ony óshirmeı ketedi, bul qaıǵyly jaǵdaıǵa alyp keledi. Osymen jınalys aıaqtaldy. Dereý iske kirisý qajet», dep qorytyndylady el Prezıdenti.