Tuńǵysh Prezıdent atyndaǵy Ulttyq qorǵanys ýnıversıtetinde oqýyn támamdaǵan túlekterdi saltanatty shyǵaryp salý rásimi ótti. 150-den astam magıstrant Qarýly kúshter ofıserler korpýsynyń, basqa da áskerı quralymdardyń qataryn tolyqtyrdy.
Elordadaǵy Ulttyq qorǵanys ýnıversıteti – elimizdegi joǵary áskerı bilim berýdiń flagmany, jańa úlgidegi áskerı oqý orny, ınnovasııalardy engizý salasyndaǵy kóshbasshy, sondaı-aq Ortalyq Azııa óńirindegi iri áskerı joǵary oqý orny. Ýnıversıtet UQShU-ǵa múshe memleketterdiń Qarýly kúshteri úshin áskerı kadrlardy birlesip daıarlaıtyn oqý oryndary tizimine engizilgen. Sonymen qatar bul ýnıversıtet elimizdiń barlyq áskerı oqý oryndary úshin vedomstvoaralyq oqý-ádistemelik ortalyq bolyp sanalady.
Ulttyq ýnıversıtettiń bastyǵy, general-maıor Lýt Alchekenov saltanatty is-sharada sóılegen sózinde qazirgi ýaqytta oqý orny jedel-taktıkalyq jáne jedel-strategııalyq basqarý býyny úshin bir jarym myńnan astam áskerı maman daıarlaǵanyn atap ótti.
– Sizderdiń aldaryńyzda óz áskerı bólimshelerińizdiń bedelin arttyrý jáne jaýyngerlik daǵdylardy joǵary deńgeıge kóterý mindeti tur. Munda biz Qazaqstan armııasynyń ofıserlerin ǵana emes, Qyrǵyz Respýblıkasynyń, Tájikstan Respýblıkasynyń jáne Armenııa Respýblıkasynyń ókilderin de daıarladyq. Sizder óz elderińizdegi qarýly kúshterdiń mindetterin oıdaǵydaı sheshýge jáne elderińizdiń táýelsizdigin nyǵaıtýǵa múmkindik beretin bilim men daǵdylarǵa ıe boldyńyzdar, – dedi ol.
Bul bilim ordasynda berilgen bilim men daǵdylardyń aýqymy óte keń ekenin atap ótken jón. Túlekter áskerı taktıka men strategııanyń erekshelikterin zerttep, shet tilderin meńgergen.
– Sizderdi áskerı qyzmettiń kezekti mańyzdy kezeńin – Qazaqstan Respýblıkasynyń eń bedeldi áskerı joǵary oqý ornynda bilim jolyn aıaqtaýlaryńyzben quttyqtaımyn. Sizder úshin bul ýnıversıtet ystyq sezim uıalatatynyna senimdimin. Sizder bilimniń mol qorymen ǵana emes, sonymen qatar dostyq qoldaý men ózara kómek rýhyn da boıǵa sińirdińizder. Bul rýh bizdiń elderimizdiń beıbit jáne josparly damýy múdde jolynda jyldar boıy nyǵaıa túsedi, – dedi Armenııa Respýblıkasynyń Qazaqstan Respýblıkasyndaǵy Tótenshe jáne ókiletti elshisi Armen Gevondıan túlekterdi quttyqtaýynda.
Magıstranttardy saltanatty shyǵaryp salý is-sharasy Qorǵanys mınıstrliginiń ansambli daıyndaǵan merekelik konsertpen aıaqtaldy.