Aǵa býyn ókilderi, eńbekqorlyq, iskerlik sııaqty qundylyqtardy úlgi kórsetý arqyly dáripteýi qajet. Bul týraly Memleket basshysy Ulttyq quryltaıdyń ekinshi otyrysynda aıtty, dep habarlaıdy Egemen.kz.
«Jas urpaq tarıh taǵylymyn jáne eldiń jarqyn bolashaqqa umtylysyn bir arnaǵa toǵystyryp jatyr. Osylaısha, olar ulttyń rýhyn jańǵyrtýda. Osy serpilistiń qarqynyn saqtaı otyryp, ony kúsheıte túsý – memlekettiń mindeti. Bul mindetti abyroımen atqarsaq, qazaqtyń renessans dáýiri, ıaǵnı túbegeıli ózgerister zamany keledi», dedi Prezıdent.
Memleket basshysynyń aıtýynsha, aǵa býyn ókilderi, eńbekqorlyq, iskerlik sııaqty qundylyqtardy úlgi kórsetý arqyly jastarǵa dáripteý kerek. Jastarymyz kóp sózge qumar, jaǵympaz, jalqaý, enjar, masyl bolmaýǵa tıis. Olardy osyndaı teris ádetterden qashyq bolýǵa úıretý kerek. Bizdiń qoǵam ózgeristi bireýden madaq estý úshin emes, eń aldymen, ózi úshin jasaýǵa tıis. Muny eldiń erteńi, urpaqtyń bolashaǵy jarqyn bolýy úshin qolǵa alý kerek.
«Ashyǵyn aıtsaq, biz keıde óz ómirimizden góri jurttyń pikirine kóbirek mán beremiz. Tipti, bul ádet qanymyzǵa sińgen deýge bolady. Árıne, qazaqtyń qonaqjaılyǵy – jaqsy qasıet. Biraq úıdiń ishi-syrtyn qonaq kelgende ǵana retke keltirý durys emes», dedi Q.Toqaev.