Memleket basshysy Qasym-Jomart Toqaev sońǵy ýaqytta memlekettik apparattyń jumysyna qatysty syn-pikir jıi aıtylatynyn nazarǵa alyp, eldiń basqarý júıesin jańǵyrtý baǵytynda naqty sharalar qabyldanyp jatqanyn aıtty, dep habarlaıdy Egemen.kz.
«Men qoǵamda memlekettik apparattyń jumysyna qatysty biraz syn-pikirler bar ekenin bilemin. Olardyń basym kópshiligi oryndy. Qazirgi tańda biz memlekettik basqarý júıesin jańǵyrtý úshin naqty sharalar qabyldap jatyrmyz. Negizgi mindet – jergilikti ózin-ózi basqarýdy kúsheıtip, memlekettik qyzmetshilerge kóbirek derbestik berý», dedi Prezıdent.
Memleket basshysynyń aıtýynsha, memlekettik apparat ókilderiniń sana-sezimin ózgertýge basa mán berý mańyzdy.
«Budan bólek, aýdan jáne aýyl ákimderin saıladyq. Oblystyq máslıhattarǵa saılaý aralas júıe arqyly, al aýdan máslıhattaryna tek bir mandattyq qaǵıdat boıynsha ótedi. Aldaǵy jumys – aýqymdy. Biraz ýaqyt qajet ekeni túsinikti. Eń bastysy, biz memlekettik apparat ókilderiniń sana-sezimin ózgertýge basa mán berýimiz qajet. Olar týǵan-týystarynyń arasynda ne bolmasa qoǵamda abyroı-bedelge ıe bolýdy emes, eń aldymen, halyqqa, elge adal qyzmet etýdi maqsat tutýǵa tıis. «Adal azamat» degenimiz – osy», dep naqtylady Qasym-Jomart Kemeluly.
Osy tusta Prezıdent sońǵy kezderi birqatar kadrlyq ózgeris jasaǵanyn tilge tıek etti. Memleket basshysynyń aıtýynsha, eń aldymen barlyq shendilerdiń iskerlik qabileti men tájirıbesi eskerilip, eshqandaı naýqanshyldyqqa jol berilgen joq.
«Bul rette, eshqandaı naýqanshyldyqqa, memlekettik qyzmetshilerdi, joǵary laýazymdy tulǵalardy jappaı qyzmetten bosatýǵa jol berilgen joq. Eń aldymen, olardyń iskerlik qabileti men tájirıbesi eskerildi. Sondaı-aq jas, bilikti azamattar birqatar mańyzdy mınıstrliktiń tizginin ustady. Árıne, olardyń tájirıbesi, sonyń ishinde ómirlik tájirıbesi az ekeni sózsiz. Biraq bul – ýaqytqa baılanysty másele. Bastysy, olardyń boıynda elimizdiń jarqyn bolashaǵy úshin adal qyzmet etýge qajetti bilim, erik-jiger bar», dep qosty el Prezıdenti.
Bul rette Memleket basshysy memlekettik qyzmetshilerdiń boıynda qandaı qasıetter bolý kerektigin de aıtty.
«Basshylyq quramdy jańartý jumysy jalǵasyn tabady. Memleket basshysy retinde aıtarym, mınıstrlerdiń, ákimderdiń jáne basqa da memlekettik qyzmetshilerdiń boıynda negizgi eki qasıet bolýy kerek. Bul – professıonalızm, ıaǵnı naǵyz maman bolý jáne otanshyldyq. Al, olardyń Prezıdenttiń jeke basyna adaldyǵy men úshin mańyzdy emes. Memleket basshysyn madaqtaýdan góri jumysty adal atqaryp, halyqtyń aldynda abyroıly bolý áldeqaıda mańyzdy. Barlyq memlekettik qyzmetshilerge osyny aıtqym keledi. Sondaı-aq jasalǵan reformalardan keıin Qazaqstan Prezıdenti memlekettik basqarýshy, ıaǵnı Konstıtýsııada kórsetilgen 7 jyldyq merzimge halyqpen ózara kelisimshartqa otyratyn menedjer retinde qyzmet etedi. Prezıdent – áýlıe emes, halyqtan bıik tulǵa emes», dep túıindedi Qasym-Jomart Toqaev.