Almatyda jańbyr men qatty jeldiń saldarynan 30-dan astam aǵash opyrylyp, qulady. Turaqtaǵy kólikterge zaqym kelip, jeldiń kesirinen keıbir úıdiń qasbeti búlindi, dep habarlaıdy Egemen.kz.
Otandyq telearnanyń málimetinshe, jeldiń saldarynan aǵashtar toqtap turǵan kólikterge qulaǵan. Tipti keıbiriniń terezeleri synǵan. Sheneýnikter kólik ıelerine sotqa júginýge keńes berdi.
Almatynyń Ekologııa jáne qorshaǵan ortany qorǵaý departamentiniń bólim basshysy Nurlan Qutybaevtyń aıtýynsha, búlingen kólikterge keltirilgen shyǵyndy óteýge qatysty ár is jeke qaralady. Bul máselelerdi sheshý úshin sotqa júginý qajet. Sot shyǵyndy qarastyrady.
Aıta keteıik, jel kólikterdi ǵana emes, ǵımarattardyń qasbetin de zaqymdady. Almatydaǵy úılerdiń birinde sylaq opyrylyp túsken. Úı nebári alty jyl buryn paıdalanýǵa berilgen. Daýyldan oıyn alańdary da búlingen.
Shaharda barlyǵy 32 aǵash qulasa, onyń 13-i eski.
Mamandar qatty jel bolǵan jaǵdaıda kóshege shyqpaýǵa jáne kólikti aǵash túbine qaldyrmaýǵa keńes berdi.