Negizgi ulttyq biryńǵaı testileý bastalǵannan beri 169 myń retten astam test tapsyryldy. Onyń ishinde talapkerlerdiń 74 paıyzy – qazaq tilinde, 26 paıyzy – orys tilinde, 0,1 paıyzy aǵylshyn tilinde testileýden ótti.
UBT bastalǵaly shekti baldy 77 paıyzdan astam talapker jınaǵan. Ortasha upaı 69 baldy qurady. Eń joǵary ball – 137, ony el boıynsha úsh talapker jınaǵan.
«UBT-nyń tórtinshi aptasy aıaqtaldy. Talapkerler testileýdiń ekinshi múmkindigin tapsyryp jatyr. Osy aptada biz Ielts jáne Toefl halyqaralyq sertıfıkattaryn «Aǵylshyn tili» boıynsha UBT balyna aýystyrý shkalasyn jarııaladyq. Sondaı-aq SAT, ACT, IB, A-Level standarttalǵan test baldary bekitildi. Bul sertıfıkat nátıjelerdi UBT balyna konvertasııalaýǵa múmkindik beredi», dedi Ulttyq testileý ortalyǵynyń dırektory Rýslan Emelbaev.
Aıta keteıik, erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń nátıjesinde UBT-ǵa tórt aptanyń ishinde 486 talapker qatysty.
Búgingi tańda 229 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 175 adam shyǵarylyp, olardyń nátıjeleri joıyldy. Bógde tulǵalar anyqtalmaǵan.
Aıta keteıik, 2023 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda talapkerdiń UBT nátıjeleri joıylady.