Ulttyq qaýipsizdik komıteti Qazaqstan Respýblıkasyna iri kólemdegi esirtki zattaryn kirgizýdiń kezekti áreketine tosqaýyl qoıdy, dep habarlaıdy Egemen.kz vedomstvonyń baspasóz qyzmetine silteme jasap.
2023 jylǵy 31 mamyrda Jambyl oblysynyń Qordaı aýdanyndaǵy «Qarasý» ótkizý pýnktinde sheteldik azamat tizgindegen júk kóligi toqtatyldy.
«Kólik quralyn tekserý barysynda ózge taýarlardyń arasyna jasyrylǵan 800 kelige jýyq kannabıs shaıyry tabyldy. Tárkilengen zattardyń «qara naryqtaǵy» quny 6 mln AQSh dollarynan asa somada baǵalandy», delingen UQK habarlamasynda.
UQK organdary esirtki zattaryn zańsyz tasymaldaý jáne ótkizý faktisi boıynsha Prokýratýra organdarymen birigip, sotqa deıingi tergeý áreketterin bastady.
Jedel-tergeý is-sharalary barysynda tárkilengen esirtki zattary Reseı Federasııasyndaǵy qylmystyq top múshelerine arnalǵany anyqtaldy.
Reseıdiń quzyretti organdarymen birlesken is-sharalar barysynda esirtki trafıginiń uıymdastyrýshylary ustaldy.