Qazaqstannyń tórt dúrkin chempıony Vladımır Sedov óz-ózine qol jumsady, dep habarlaıdy Egemen.kz.
Bul aqparatty Jetisý oblysynyń polısııa departamenti rastady. 35 jastaǵy sportshynyń máıiti ózi turyp jatqan Qaratal aýdanynyń Dostyq aýylynan tabylǵan.
«Zorlyqpen óltirý belgileri tabylǵan joq. Týystarynyń málimeti boıynsha, er adam óz- ózine qol jumsaǵan. Qazirgi tańda sotqa deıingi tergeý jumystary júrgizilýde. Qylmystyq is aýdandyq polısııa basshylyǵynyń nazarynda», dep habarlady Jetisý oblystyq polısııa basqarmasy.
Aıta keteıik, Vladımır Sedov – Qazaqstannyń eńbek sińirgen sport sheberi, 2008 jylǵy Beıjiń Olımpıadasynyń qatysýshysy, Qazaqstan Respýblıkasynyń tórt dúrkin chempıony, 2010 jylǵy Qazaqstan chempıonatynyń rekordsmeni. Sátti óner kórsetkeni úshin «Qurmet» ordenimen marapattalǵan.
Ziltemirshiniń juldyzdy kezeńi 2009-2016 jyldar aralyǵynda boldy. Ol álem chempıonattarynda birneshe medal jeńip alǵan edi. Sodan keıin sportshynyń dopıng qabyldaǵany anyqtalyp, Halyqaralyq aýyr atletıka federasııasy onyń barlyq medaldaryn qaıtaryp aldy.