Qazaqstannyń kóshbasshy tennısshisi Elena Rybakına Ýımbldon týrnırinde úshinshi raketka bolyp tirkeldi, dep habarlaıdy Egemen.kz.
Álemdik reıtıngte úshinshi satyda turǵan elimizdiń maqtanyshy Elena Rybakına ótken jylǵy chempıondyq ataǵyn qorǵaıdy.
Qazirgi kezde irikteý saıystary ótip jatqan Ýımbldon jarysynda Polsha ókili Iga Shventek – birinshi, Belarýs ókili Arına Sobolenko ekinshi raketka bolyp tirkelgen. Olar tek fınalǵa shyqqanda ǵana bir-birimen baq synasa alady.
«Úlken dýlyǵa» dodasynyń ótken jylǵy fınalısi, týnıstik Ons Jaber altynshy raketka retinde synǵa túsedi.
Aıta keteıik Qazaqstannyń erler arasynda – birinshi, álemniń 27-raketkasy Aleksandr Býblık Ýımbldonda alǵash ret tańdaýlylar qatarynda baq synaıdy. Jýyrda Galledegi iri jarysta tamasha óner kórsetip, jeńimpaz atanǵan A.Býblık jarysqa 24-raketka bolyp qosylmaq.