QR Prezıdentiniń keńesshisi Málik Otarbaev, QR Syrtqy ister mınıstrligi «Otandastar qory» KeAQ prezıdenti Abzal Saparbekuly, Qazaqstan Respýblıkasynyń Mońǵolııadaǵy Elshisi Ǵabıt Beıbituly Qoıshybaev pen bir top QR Parlamenti Senaty men Májilis depýtattary bastaǵan qazaqstandyq delegasııa músheleri Baıan-О́lgıı aımaǵyna at basyn tiredi, dep habarlaıdy Egemen.kz.
Quryltaıǵa qatysýshylar arasynda Qazaqstannan kelgen dıplomatııa ardagerleri, zııaly qaýym ókilderi, qoǵam qaıratkerleri men Túrkııa jáne Reseıden kelgen qandastar bar.
Arnaıy saparmen kelgen qonaqtardy Baıan-О́lgıı aımaǵynyń ákimi Kamelııat Ahmadııauly men Baıan-О́lgıı halqy áýejaıdan shashý shashyp qarsy aldy.
Aımaq gýbernatory Kamelııat Ahmadııauly, Máslıhat Tóraǵasy Habyl Shárıvuly bastaǵan delegasııalar arasyndaǵy kezdesýde Abzal Saparbekuly qazaqstandyq delegasııa quramyn tanystyryp, aldaǵy 2 kúndik Kishi Quryltaıdyń jemisti bolýyn tiledi.
О́z kezeginde Kamelııat Ahmadııauly «Bermeseń almaısyń! Barmasań alystaısyń!» demekshi 10 jyldan asa úzilip qalǵan Mońǵolııa qazaqtarynyń kishi quryltaıynyń qaıta jalǵasyn tapqanyna qýanyshty ekenin aıtty. Qazaqstandyq delegasııa quramynda QR Prezıdenti keńesshisi men senator, depýtattardyń bolýy bul is-sharaǵa degen mańyz berýdiń dáleli dep atap ótti. Aımaq gýbernatory aımaqtyń ekonomıkalyq-áleýmettik jáne halyqtyń tynys-tirshiligi týraly keńinen málimet berdi.
Qazaqstan Respýblıkasy Prezıdentiniń keńesshisi Málik Otarbaev Prezıdent Qasym-Jomart Kemelulynyń ystyq sálemin jetkizýge arnaıy kelgenin aıtyp, Qazaqstan qashan da ishki tynyshtyqpen qatar syrtqy baılanysty úzbeý saıasatyn nyq ustanatynyn, sonymen qatar Prezıdentimiz qashan da shette júrgen qandastarymyzdyń máselesin nazarda ustaıtynyn, olarmen baılanysty nyǵaıta túsýge asa mán beretinin aıtty.
QR Májilis depýtattary Únzıla Shapak, Nurgúl Taý, Jarqynbek Amantaı óz sózderinde eki eldiń parlamentaralyq baılanystarynda kún tártibindegi máseleler, elimizdegi quqyqtyq-demokratııalyq reformalar týraly baıandady.
Baıan-О́lgıı aımaqtyq máslıhatynyń tóraǵasy ata-babamyz osy eldiń órkendep ósýine úlken úles qosyp, búginde Baıan-О́lgıı aımaǵyndaǵy qazaqtardyń emin-erkin ómir súrýine jaǵdaı jasady, sol isti ári qaraı jalǵastyryp kele jatqanyn aıtyp, memleketter arasyndaǵy dostyqtyń mańyzdylyǵyna toqtaldy.
Sonymen qatar Baıan-О́lgııdegi qandastarmen rýhanı-mádenı baılanysty arttyrý máseleleri de taqyrypqa ózek boldy.