Qazaqstannyń paravoleıbol quramasy Azııa chempıonatynyń kúmis júldegeri atandy, dep habarlaıdy Egemen.kz.
Astanada otyryp oınaıtyn voleıboldan Azııa chempıonaty aıaqtaldy. Chempıonat 3-8 shildede elordadaǵy J. Úshkempirov atyndaǵy jekpe-jek saraıynda ótti. Dodaǵa 8 elden Qazaqstan, Japonııa, Taıland, Iran, Irak, Ońtústik Koreıa, Mońǵolııa jáne Úndistannan 200-den astam sportshy baq synasty.
Qazaqstan quramasy 6 shildede jartylaı fınalda Qytaı komandasyn 3:2 esebimen jeńdi. Nátıjesinde, Azııa chempıonatynyń fınalyna shyǵyp, 2024 jyly Parıjde ótetin Paralımpıada oıyndarynyń lısenzııasyn utyp aldy.
Búgin Qazaqstan quramasy Iran komandasymen fınaldyq kezdesý ótkizdi. Oıyn óte tartysty ótti. О́ıtkeni, eki komanda da osal emes. Iran quramasy – chempıonattaǵy barlyq kezdesýde jeńilmegen jalǵyz komanda. Al, Qazaqstannyń paravoleıbolshylary álemdik reıtıngte 7-shi, Azııa reıtınginde 2-orynda tur.
Kezdesýdiń birinshi kezeńinde ırandyqtar 25:21 esebimen jeńiske jetti. Al, Qazaqstan quramasy ekinshi kezeńdegi alǵashqy upaıdy ıelengen edi. Alaıda, qarsylastar basymdyǵyna toıtarys berý ońaıǵa túspedi. Ekinshi kezeńniń nátıjesi – 25:14 bolyp, jeńis qarsylas komandanyń úlesine jazyldy.
Sheshýshi úshinshi kezeńde de qazaqstandyq paravoleıbolshylar upaıdy kóbirek enshileýge talpyndy. Esep aıyrmasyn qysqartyp, basymdyqty ıelenýge umtylǵan qazaq oıynshylary úshin bul kezeń qarsylastar enshisinde ketti. Esep – 25:17.
Sonymen Qazaqstannyń paravoleıbol komandasy Azııa chempıonatynyń kúmis júldegeri atandy.
Bul kezdesýde tóreshiler tarapynan eki komandanyń oıynshylaryna birneshe ret sary qaǵaz kórsetildi.