«AMANAT» fraksııasynyń músheleri Aına Mysyrálimova men Natalıa Dementeva Aqmola óńirine jumys saparymen baryp, partııanyń saılaýaldy baǵdarlamasy aıasynda iske asyrylyp jatqan birqatar nysandy aralady, dep habarlaıdy Egemen.kz.
Birinshi kezekte depýtattar Aqkól qalasynda medısına qyzmetkerlerine arnalǵan emdeý-saýyqtyrý ortalyǵynyń qurylysy barysymen tanysty. Onyń qurylysyna bıýdjetten 4,5 mlrd teńge bólinip otyr. Merdiger kompanııanyń ókili qurylystyń kestege saı júrgizilip jatqanyn jáne belgilengen merzimde aıaqtalatynyn atap ótti.
«Dál qazirgi ýaqytta elektr, telekommýnıkasııa men sý jelileri tartylyp jatyr. Sonymen qatar emdeý korpýsynyń, qonaq úı men basseınniń qurylysy qarqyndy júrgizilýde. Qurylys aıaqtalǵan soń ortalyqta 50 adamdy jumyspen qamtý kózdelýde», dedi qurylys barysyn tanystyrǵan «SENIM» densaýlyq saqtaý qyzmetkerleriniń salalyq kásipodaǵy» tóraǵasynyń keńesshisi Dına Nurpeıisova.
Májilis depýtattary Aqkól qalasyndaǵy №4 orta mektepte de boldy. Qazir onda sport zal men ashana salynyp jatyr. Budan bólek, halyq qalaýlylary emdeý-saýyqtyrý qonaq úı keshenine bardy. Onyń qurylysy bıyl aıaqtalady dep josparlanyp otyr. Mamandar demalys ortalyǵy astanalyqtar men irgeles jatqan aýdan turǵyndary úshin jaıly demalys ornyna aınalady degen senimde.
Sondaı-aq A.Mysyrálimova men N.Dementeva 900 turǵyny bar Dombyraly aýylynda 16 shaqyrym sý qubyryn jóndeý jumystarymen tanysty. Qazirgi tańda 2,2 shaqyrym qubyr tóselip, 43 uńǵyma ornalastyrylǵan.
«Partııanyń qoǵamdyq qabyldaýlaryna Dombyraly aýylyndaǵy sý qubyrlaryn jóndeý boıynsha talaı aryz-shaǵym kelip tústi. Sondyqtan aýdandyq máslıhat janyndaǵy «AMANAT» fraksııasynyń músheleri aýyl turǵyndaryn taza aýyz sýmen qamtamasyz etý máselesin erekshe baqylaýynda ustaýy kerek», dedi Aına Mysyrálimova.
Májilis depýtattary aýdandyq máslıhattaǵy depýtattyq fraksııa múshelerimen «AMANAT» partııasy saılaýaldy baǵdarlamasynyń Jol kartasynyń oryndalý barysyn talqylap, azamattardy qabyldady.