Prezıdent Qasym-Jomart Toqaev «Onlaın-platformalar jáne onlaın-jarnama týraly» Zańǵa qol qoıdy. Bul qujat – elimizdiń qoǵamdyq qatynastarynyń basty ındıkatory sanalatyn áleýmettik jelilerdi retteýdiń ádisi.
Plıýralızmdi damytý áleýmettik jeli mádenıetin arttyrýdy talap etetinin ómir kórsetip otyr. Olar búginde negizgi aqparat kózi men qoǵamdyq-saıası baǵytty qalyptastyratyn platformaǵa aınaldy. Áleýmettik jelilerdiń qoǵamnyń jappaı sanasyna áserin, onlaın keńistikte jańa ekonomıkalyq qatynastardyń qalyptasqanyn eskere otyryp, Májilistiń bir top depýtaty «Onlaın-platformalar jáne onlaın-jarnama týraly» Zań jobasynyń bastamashysy boldy. Qujatty daıarlaýǵa Májilistegi barlyq fraksııa ókilderi qatysty.
Zańnyń qoǵamnyń damýy úshin mańyzdylyǵyna oraı, zań jobasyn ázirleıtin jumys tobyna belgili jýrnalıster, jelini paıdalanýshylar, osy saladaǵy kásibı sarapshylar tartyldy. Búkil sheteldik, eýropalyq, AQSh-tyń osy salany retteýdegi tájirıbesi saraptaldy. Qujattyń qabyldanýy elimizdegi onlaın-platformalardyń qyzmeti úshin quqyqtyq negizder qalyptastyrady, onlaın-platformalar men onlaın-jarnama salasyndaǵy retteýdiń normatıvtik negizin konseptýaldyq turǵydan ózektendirýge múmkindik beredi.
Oǵan qosa, Eýropalyq odaq qabyldaǵan Digital Services Act nemese sıfrlyq qyzmetter týraly zańnyń balamasy ispetti bul zań álemdik áleýmettik jelilerdiń ınterfeısin qazaqshalaý, ınflıýenserlerdiń jarnamasyn tańbalaý, zańsyz kontentti neǵurlym tıimdi moderasııalaý máselelerin de retteıdi.
Zań aıasynda kóleńkeli ekonomıka úrdisin azaıtý jáne onlaın alaıaqtyqpen kúresý boıynsha qajetti sharalar qabyldanady. Basqasha aıtqanda, oflaın ómirdegi jaýapkershilik onlaın álemde mindetteledi. Sondaı-aq saıası separatızmniń basty profılaktıkasy bolmaq. Jalpy, qabyldanǵan zań azamattardyń quqyqtary men bostandyqtaryn tolyqqandy iske asyrý úshin onlaın-platformalarmen tıimdi yntymaqtastyq pen ózara is-qımyl ornatýǵa múmkindik beredi.
Qazirdiń ózinde álemge áıgili áleýmettik jeliler men onlaın-platformalar áriptestik ornatýǵa yqylasty ekenin tanytyp, keıbiri ókilderin taǵaıyndady. Osy oraıda osy zańǵa bastamashy bolǵan barlyq depýtatqa, jalpy Májilis jáne Senat depýtattaryna, jumys tobynyń múshelerine, usynys aıtqan, qoldaý bildirgen barsha belsendi azamatqa alǵys aıtamyz. Jańa zań elimizdegi qoǵamdyq qatynastyń parasattylyǵyn arttyryp, memleketimizdiń tutastyǵyn nyǵaıtyp, separatızmge jol bermeı, salıqaly saıası mádenıet qalyptastyrýǵa óziniń septigin tıgizedi dep senemiz.
Erlan SAIROV,
Májilis depýtaty