«Ortalyq Azııa + Shyǵanaqtaǵy arab memleketteriniń yntymaqtastyq keńesi» birinshi sammıtine qatysyp otyrǵan Prezıdent Qasym-Jomart Toqaev Qazaqstan bul aýqymdy kezdesýge erekshe mán beretinin alǵa tartty, dep habarlaıdy Egemen.kz Aqordaǵa silteme jasap.
«Qazaqstan búgingi kezdesýge erekshe mán beredi. Úlken saıası yqpalǵa, ekonomıkalyq jáne ınvestısııalyq áleýetke ıe Shyǵanaq elderi kóptegen negizgi baǵyttar boıynsha bizdiń mańyzdy seriktesterimiz bolyp tabylady.
Ortalyq Azııa memleketteriniń óńirishilik yntymaqtastyǵyn jandandyrý jáne óńirdiń jahandyq mańyzdylyǵyn nyǵaıtý bizdiń kópjosparly ózara is-qımylymyzdy keńeıtý úshin jańa múmkindikter ashady. Árıne, bul iske «OA+» dıalogtyq formattary eleýli úles qosady», dedi Memleket basshysy.
Osy tusta Prezıdent yntymaqtastyqty odan ári nyǵaıtý úshin birneshe basym baǵyt boıynsha óz pikirin ortaǵa saldy.
«Eń aldymen, bul – saýda-ekonomıkalyq baılanystardy keńeıtý. Sońǵy jyldary bizdiń aımaqtyń yntymaqtastyq keńesi elderimen saýda-sattyǵy qarqyndy damı bastady. Muny erekshe atap ótken jón. Biraq kórsetkishter bizdiń áleýetimizdiń tolyq paıdalanylmaı otyrǵanyn kórsetedi. Taýar aınalymyn aıtarlyqtaı arttyrý úshin bizde barlyq múmkindik bar», dedi Prezıdent sammıt barysynda.
Qasym-Jomart Toqaevtyń aıtýynsha, ol úshin ózara saýda nomenklatýrasyn ulǵaıtý qajet.
«Mysaly, Qazaqstan qysqa merzimde quny shamamen 400 mıllıon dollar bolatyn 100 túrli taýar eksporttaýǵa daıyn», dedi Qazaqstan Prezıdenti.