Halyqaralyq fýtbol federasııasy (FIFA) ulttyq quramalardyń shilde aıyndaǵy reıtıngin jarııalady. Maýsym aıynda Qazaqstan ulttyq quramasy segiz saty joǵarylap, 112-den 104-orynǵa kóterilgen edi. Shildedegi reıtıngte asa qatty ózgeris bola qoıǵan joq.
Magomed Adıev shákirtteri maýsym aıynda 2024 jylǵy Eýropa chempıonatynyń irikteý kezeńinde eki match ótkizip, ekeýinde de jeńiske jetken bolatyn. Syrt alańdaǵy birinshi kezdesýde San-Marıno quramasyn jeńse (3:0), ekinshi oıynda Soltústik Irlandııany tize búktirgen-di – 1:0.
FIFA reıtınginiń alǵashqy ondyǵynda turǵan quramalardyń da oryndary ózgerissiz qaldy. Ádettegideı reıtıngte 2022 jylǵy álem chempıondary – Argentına quramasy kósh bastap tur. Odan keıingi oryndarǵa Fransııa, Brazılııa, Anglııa, Belgııa, Horvatııa, Nıderland, Italııa, Portýgalııa jáne Ispanııa jaıǵasqan.