Elordanyń «Astana» klýby bıylǵy Chempıondar lıgasynyń alǵashqy irikteý kezeńin sátti bastap, jarystyń ekinshi kezeńine joldama aldy. El chempıondary irikteýdiń alǵashqy satysynda Grýzııanyń dańqty «Dınamo» komandasymen kezdesip, eki matchtyń qorytyndysy boıynsha 3:2 esebimen basym tústi. Osydan bir apta buryn «Astana Arenadaǵy» birinshi oıynda qarsylastar teń túsken edi – 1:1. Endi, mine, kúni keshe Tbılısıdegi jaýapty matchta jerlesterimizdiń mereıi ústem boldy – 2:1.
«Dınamo» men «Astana» arasyndaǵy qarymta kezdesý Qazaqstan men Grýzııa klýbtarynyń talaı tartysty oıyndarynyń kýási bolǵan Tbılısıdegi Borıs Paıchadzeniń atyna berilgen «Dınamo-Arena» stadıonynda ótti. 1915 jyly Qap taýynda dúnıe kelgen Borıs Paıtchadze Grýzııa men «Dınamo» klýbynyń ańyz oıynshysy sanaldy. 2001 jyly ol 20 ǵasyrdaǵy Grýzııanyń eń úzdik fýtbolshysy dep tanylǵan.
55 myńnan asa jankúıerlerge arnap salynǵan bul stadıonda keńes ókimeti tusynda Almatynyń «Qaıraty» men «Dınamo» klýbtary birneshe márte kezdesse de, jerlesterimiz birde-bir oıynda jeńiske jete almaı, Qazaqstanǵa janarymen jer shuqyp oralǵan-dy. 1963 jyly Tbılısıde bastalǵan eki ujym arasyndaǵy «teketires» 1988 jylǵa deıin jalǵasty. Osy ýaqyt aralyǵynda komandalar jasyl alańda 45 márte jolyǵyp, sonyń nebári jeteýinde ǵana jerlesterimizdiń mereıi ústem bolǵan. Al 16-oıynda qarsylastar teń nátıjege qol jetkizse, 22-oıynda grýzııalyqtardyń asyǵy alshysynan túsken-di. «Qaırat» pen «Dınamo» arasyndaǵy ázirge eń sońǵy oıyn 1988 jyldyń 31 qazanynda ótip, almatylyqtar 3:1 esebimen «Dınamoǵa» jol bergen.
25 jyldyń ishinde «Qaırat» Tbılısıde 20-dan asa oıyn ótkizip, Grýzııada daralana almaǵanymen, elimizdiń taǵy bir ujymy – «Astana» alǵashqy oıynda-aq alań qojaıyndarynyń aıaǵyn aspannan keltirdi. Elordadaǵy matchta teń nátıjege qol jetkizgen grýzııalyqtar óz alańyndaǵy oıyndy senimdi ári jeńiske degen jigermen bastady. Jankúıerleriniń qyzý qoldaýyna ıe bolǵan «Dınamo» fýtbolshylary alǵashqy taımda jasyl alańda erkin oıqastap, «Astana» qaqpasynyń mańaıynda birneshe márte qaýipti shabýyl uıymdastyryp, dopty qaqpaǵa alystan da, jaqynnan da teýip kórdi. Biraq kezdesýdiń 20-mınýtyna deıin onyń eshqaısysyn golǵa aınaldyra almady. Arada kóp ýaqyt ótpeı «Dınamo» fýtbolshylary sol qaptalmen shabýyl uıymdastyryp, ony Ýsman Kamara golmen túıindedi. Bir qorǵaýshymyzdy jyldamdyǵymen qapy qaldyrǵan Kamara osylaısha birinshi taımnyń bel ortasynda óz komandasyn esepte alǵa shyǵardy – 1:0.
Úzilisten keıin «Astana» bas bapkeri Grıgorıı Babaıan ortalyq alańda oıyny júrmeı jatqan serbııalyq jartylaı qorǵaýshy Dýshan Iovanchıchtiń ornyna armenııalyq Kamo Oganesıandy shyǵardy. Sóıtip, komandanyń ortalyqtaǵy oıyny jandanyp, qarsylas komandanyń qaqpasyna qaraı uıymdastyrylǵan shabýyl sany da arta tústi. Bul taktıkalyq ózgeristiń nátıjesi de kóp kúttirgen joq. Kezdesýdiń 50-mınýtynda Aleksa Amanovıchtiń oń qaptaldan aıyp alańyna asyrǵan pasyn Abzal Beısebekov eki qorǵaýshynyń qorshaýynda qalyp qoısa da, aıaǵyna yńǵaıly kelgen dopty oń aıaǵymen qaqpanyń sol jaq buryshyna dál kózdedi. Gol! «Astana» fýtbolshylary da, jankúıerleri soǵylǵan goldyń qýanyshynan es jıyp úlgeremin degenshe elordalyq ujymnyń gambııalyq fýtbolshysy Dembo Darbo «Astananyń» ekinshi golyn soǵyp ketti. Bul joly da nátıjeli pasty Aleksa Amanovıch bergenin atap ótken jón. Darbo dopty ala salyp, qarsylastardyń aıyp alańyna kirgen boıda dopty qaqpanyń «toǵyzdyǵyna» toǵytty. Esep – 2:1. Osydan keıin alań ıeleri tarazy basyn teńestirýge birneshe márte talpynǵanymen, gol soǵýǵa shamalary jetpedi. Sóıtip, kezinde Eýropa jasyl alańynda jasyndaı jarqyldaǵan «Astana» komandasy aınaldyrǵan eki mınýttyń ishinde eki gol salyp, tamasha kambekpen Chempıondar lıgasynyń kelesi aınalymyna ótti.
Ekinshi kezeńde «astanalyqtardy» taǵy bir Eýropanyń dańqty «Dınamosy» kútip tur. Bul joly olar Zagrebtiń «Dınamosymen» sheberlik baıqasady. Horvatııanyń 22 dúrkin chempıony da «Astanaǵa» bóten komanda emes. О́ıtkeni eki ujymnyń buǵan deıin 2018 jylǵy Chempıondar lıgasynyń úshinshi irikteý kezeńinde joldary túıisken. Astanada ótken alǵashqy oıynda qonaqtar 2:0 esebimen basym tússe, Zagrebtegi ekinshi básekede alań ıeleri 1:0 esebimen kelesi kezeńniń joldamasyn shegelep qoıdy.
«Astana» men «Dınamo Zagreb» arasynda ekinshi irikteýdiń alǵashqy oıyny 25-26 shildede Zagrebte, qarymta match 1-2 tamyzda «Astana Arenada» ótedi dep josparlanǵan. Kezdesýdiń naqty kúnderi jaqyn arada belgili bolady. «Astanadan» jeńilgen Tbılısıdiń «Dınamosy» Eýrokýboktegi jolyn endi Konferensııa lıgasynda jalǵastyrady. Olar ekinshi kezeńde Maltanyń «Hamrýn Spartans» ujymymen kezdesedi.