Karateden Qazaqstan quramasy Malaızııada ótken Azııa chempıonatynda 3 altyn, 4 kúmis jáne 4 qola medal oljalap, jalpykomandalyq esepte birinshi orynǵa ıe boldy.
Otandastarymyzdyń arasynan jeńis tuǵyryna erler arasyndaǵy Premer-lıga jarystarynyń jeńimpazy, Islam yntymaqtastyǵy oıyndarynyń chempıony Qaısar Alpysbaı (60 kg) jáne Azııa birinshiliginiń jeńimpazy men álem chempıonatynyń eki dúrkin qola júldegeri, Tokıo Olımpıadasyna qatysýshy Nurqanat Ájiqanov (75 kg) kóterilse, qyzdar saıysynda Azııa chempıony, Tokıo Olımpıadasynyń qola júldegeri Sofıa Berýlseva (68 kg) top jardy. Sonymen qatar Dıdar Ámiráli (67 kg), Móldir Jańbyrbaı (50 kg), Gúlmıra Úsenova (55 kg) jáne «kýmıte» boıynsha erler komandasy kúmis medal jeńip aldy.
Al Jolaman Bıǵabyl (55 kg), Lııa Qoshqarbaeva («kata» jattyǵýy), Danııar Iýldashev (84 kg) jáne Abylaı Tóltaı (84 kg) el qorjynyna qola júlde saldy. Aıta keteıik, bıylǵy Azııa birinshiligine sary qurlyqtyń 31 elinen kelgen eń tańdaýly 400-den asa karate sheberi qatysty. Olardyń arasynda el namysyn 19 sportshy qorǵady.