Petropavl qalasynan Qorǵan shekarasyna deıingi Chelıabi–Novosibir respýblıkalyq mańyzy bar jol ýchaskesiniń jóndeý jumysy qaıta jandandy, dep habarlaıdy Egemen.kz.
Atalmysh jol ýchaskesiniń jóndeý jumysy 2017 jyly bastalǵan edi. Alaıda jumysyna salǵyrttyq tanytqan merdigerler men uzaqqa sozylǵan sot prosesi saldarynan toqtap qalǵan. Bıyl bul jumystar jalǵasyn tapty.
Merdigerlik qyzmetti «QazStroıTehnık» JShS júzege asyryp jatyr. Mamlıýttan «Jańa jol» beketine deıin qaıta jańartylatyn ýchaskeniń jalpy uzyndyǵy – 56 shaqyrymdy quraıdy, oǵan respýblıkalyq bıýdjetten shamamen 10 mlrd teńge bólinip, onyń 3,5 mlrd teńgesin bıyl ıgerý josparlanǵan.
Aıta ketsek, Respýblıkalyq saılaýaldy shtabtyń 1 naýryzda SQO-ǵa sapary barysynda partııa Tóraǵasy Erlan Qoshanovtyń bergen tapsyrmasyna sáıkes, atalǵan oblystaǵy joldardy jóndeý, onyń ishinde respýblıkalyq mańyzy bar joldardy qaıta jańartý boıynsha monıtorıngti «AMANAT» partııasynyń músheleri júrgizedi. Aımaqta partııalyq baqylaý komıssııalary janynan 15 monıtorıngtik top jumys isteıdi.
«Búginde 14 shaqyrym jolǵa jabynnyń tómengi qabatyn tóseý boıynsha jumystar júrgizildi. Taǵy 16 shaqyrym jolǵa tóselý kerek. Qazirgi ýaqytta negizgi joldyń tósemi jáne aınalma joldy jóndeý jumystary júrgizilip jatyr. Jóndeý jumysy eki jylǵa josparlanǵan. Uıymdastyrýshy – «QazAvtoJol» UQ» AQ. Barlyq jumystar kelesi jyly aıaqtalýy tıis. Biz jumystyń ýaqytyly júrgizilýin qadaǵalaımyz», dedi «AMANAT» partııasy Mamlıýt aýdandyq fılıalynyń tóraǵasy Altyn Saǵıtova.
Amanattyqtar Chelıabi–Novosibir jol ýchaskesin ǵana emes, oblystaǵy basqa da birneshe joldardyń jóndeý jumystaryn baqylaıdy.