Fýtbolshylar gol soǵady. Shamamen jıyrma kisi arbasyp, qyryq kóz, qyryq aıaqtyń arasynan aılasyn asyryp, ala dopty alyp shyǵyp, qaqpaǵa salý degen... Álgi jıyrmanyń jantalasy, arbasýy, aqyl-aılasy, aıbar-susy men mysy – bári-bárin ótip kelgeni az, aldyndaǵy qaqpashyny da qapy qaldyrý kerek. Qas-qaǵym sátte onyń da esebin taýyp, qaqpashynyń butynyń arasynan dopty bult etkizdi delik.
Stadıon shý ete qaldy. Álgi dopteber jer-kókke syımaı stadıondy aınalyp júgirgen saıyn halyqtyń da qoshemeti artyp, aıqaı-shýdan qulaq tunady. Áriptesteri qaýmalap tóbesine kóteredi. Gol salǵan fýtbolshy odan beter masattanyp, shý kótergen jankúıerlerge taman ter sińgen jeıdesin sheship laqtyrǵanda... Qol jeter jerdegiler bir-birin basa-kóktep, qyrylyp qala jazdaıdy. Oılamaǵan jerden qolyna terge shylqyǵan jeıde túsken jankúıerdiń basy baqyttan aınalary haq. Osynyń bári halyq úshin qyzyq, emirenter estelik. Jas baladaı jankúıer fýtbolshynyń qaqpaǵa dop toǵytqanyn qyzyqtaıdy. Tipti jete almaı qalǵandary ǵalamtor arqyly báske aqsha tigip baqylaıtyn bolǵan. «Asyq oınaǵan azar, dop oınaǵan tozar» deıtin qazaq, erterekte. Qazir bári kerisinshe. Dop oınaı bilgen ozatyn boldy. Ala dopshy qaýymnyń ónerin, halyqtyń yqylasyn kústánalaý oıymyzda joq. Jan azyǵyn, uly rýh sáýlesin shashyp-tógip júretin ádebıetten bul da qaqas qalmaǵan taqyryp.
«Aqynbyz» dep qaqpaı-aq keýdemizdi,
Aınalamyz tanıdy keıde bizdi.
Fýtbolıster sııaqty jankúıerge
Jyrtyp-jyrtyp bermeı-aq jeıdemizdi,
Aınalamyz tanıdy keıde bizdi…»
deıdi Ábdirashtyń Jarasqany.
Ǵajap qoı! Osy shýmaqtaǵy astarly oıdy túsingen júrek ıesi kekesindi qosa uǵar edi.
Fýtbolshynyń eńbegi men ónerinde gáp joq. Qabilet pen eńbek, shabyt pen sheberlik, taǵy basqalary qosyla kele «go-ol!» degen jalǵyz aýyz sózdiń aınalasyna toqaılasady. Al aqyndar she? «Fýtbolıster sııaqty jankúıerge jeıdesin jyrtyp-jyrtyp bermeıdi», biraq júregin usynady ǵoı. Gúldeı júregin! Ter sińgen jeıdeńiz ne, aıaýly jan sińgen, rýhanı nár sińgen, sezim men ár sińgen júregin, ottaı janǵan júregin oqyrman aldyna laqtyra salǵanda... Siz ne kúı kesherińizdi bilmeımin. Menińshe jyr táńiriniń ózi ári-sári kúıde ańtarylyp qalatyn shyǵar sol sátte. Meniń oıyma orys álemine keńinen tanymal, sózin Andreı Voznesenskıı jazdy deıtin, A.Pýgacheva oryndaıtyn «Mıllıon alyh roz» mátininiń oqıǵasy oraldy. Álgi ártistiń esiginiń aldyna tóselgen myńdaǵan raýshan gúl – sýretshiniń sezim toly júregi emeı ne? Mahabbatqa masaıǵan júrek qana solaı myńdap gúldeı alady. Mahabbatqa tolǵan júrek gúldeýden jalyqpaıdy. Al ana gúldi unatatyn aktrısa nege toqtamady mıllıondaǵan gúlderge? Menińshe, ol sahnalarda myńdaǵan halyq aldynda alǵandy unatqan. Gúldi shyn súıe almaǵan, halyqtyń qoshemet, qolpashyna mas bolǵan sııaqty. Halyq ta sondaı, keıde...
«О́mir bizge úıindeı ákemizdiń,
Jiberemiz ákesin qateńizdiń!
Jabylmaıdy esigi janymyzdyń,
Jabylmaıdy esigi kafemizdiń,
О́mir bizge úıindeı ákemizdiń!
Týǵandaımyz ýaqyttan erte, dara,
Ortaǵa da túsemiz,
Alqaǵa da!
Erke bala kónbeıdi qaqpaılaýǵa,
Taıaqty da kóp jeıdi erke bala,
Týǵandaımyz ýaqyttan erte, dara!
Bara almaıdy ondaıǵa árkim bitken,
Árkim bitken,
Áliptiń artyn kútken.
Júrekterdi biz eger tutqyndasaq —
Tutqyndaıtyn shyǵarmyz erkindikpen!»
Demek, erkindiktiń syry tereńde. Erkindik el oılaǵandaı halyqtyń aldyna shyǵyp, óńesh kerip, julynyp, kópti eliktirý emes. Júrektiń, jannyń qalaýy arqyly izgilikke, ańsar sezimderge qol sozý. Tipti oryndalmasyn bilse de, táýekel etý. Ǵashyq bolyp qalǵan aqyndaı nemese «Mıllıon alyh roz» ánindegi sýretshideı mahabbatynyń jolyna búkil úı-kúıin satyp jiberip gúl tóseý. «Jyrtyp-jyrtyp bermeı-aq jeıdemizdi...». Ondaı erlikke barý úshin de júrek toly mahabbat kerek shyǵar.
Aqyndar sezim shúpildegen júregin halqynyń aldyna laqtyra salyp, táńiriniń qalaýymen qaıta tirilip, qaıta mazdap ómir súrip keledi. Sezim ǵana jasyrylǵan ba ol júrek ishinde. Ne joq deısiz? Aqyl-oı men rýh qazynasy! Stadıonǵa kóp barmaıtyn, barsa da elden erekshelenip júretin, dyr-dýmanǵa erip ketpeıtin olardy «zamanǵa kúılegen» qaısybir top «birtúrli, qalyp qoıǵan» deýi ábden múmkin. Durys, olar rýh pen parasat patshalyǵynda qalyp qoıǵandar.