Atyraý oblysyndaǵy Qurmanǵazy aýdany Reseıdiń Astrahan óńirimen shektesedi. Eki óńirdiń shekarasyn Qıǵash ózeni bólip tur.
Shekaradaǵy ózenniń saǵasynda lotos gúldeıtin 5 gektarǵa jýyq alqap bar. Qyzǵylt tústi lotostyń bıiktigi 150 santımetrge deıin jetedi. Sý ortasynda ósetin sırek gúl tańerteń qaýyzyn ashyp, keshke qaıta jabady. Lotos gúldegen Qıǵash ózenine Aqtóbe – Atyraý – Reseı shekarasy baǵytyndaǵy jolmen jetýge bolady. Atyraýdan ara qashyqtyq – 300 shaqyrymǵa jýyq.
Bul gúldi vetnamdyqtar tazalyqtyń sımvoly retinde baǵalaıdy eken. Tipti onyń emdik qasıeti baryna senedi. Ásirese tuqymyndaǵy aqýyz búırek pen kókbaýyr, júrek aýrýy men uıqysyzdyqty emdeýge qoldanylady.
Jaqynda osyndaı ereksheligi bar lotos ósetin alqap sýretshilerdiń týyndysyna arqaý boldy. Atyraý oblystyq mádenıet, tilderdi damytý jáne arhıv isi basqarmasynyń basshysy Ábil Jolamanovtyń aıtýynsha, «Sý betindegi sulýlyq» planeri alǵash ret uıymdastyrylyp otyr. Oǵan Almaty, Qyzylorda, Aqtóbe jáne Atyraýdan 10 sýretshi qatysty.
«Respýblıkalyq planerdi ótkizý kezinde birneshe maqsat kózdeldi. Birinshiden, Atyraý oblysynyń Reseımen shekarasyndaǵy Qıǵash ózeninde ósetin, «Qyzyl kitapqa» engen lotos gúlin kenep betine túsirý. Ekinshiden, sý betindegi sulýlyqty boıaýlar úndestigimen beınelep, ishki týrızmdi damytýǵa úles qosý. Úshinshiden, týǵan ólkege súıispenshilikti arttyrý. Tórt óńirden qatysqan sýretshiler bir-birimen tájirıbe almasty», deıdi Ábil Jolamanov.
Sýretshiler Qıǵash jáne Sharon ózeniniń ańǵaryndaǵy tabıǵat kórinisin, sý betindegi sulýlyqty kenepke beınelelegen kompozısııa jasady. Sýretshiler odaǵynyń múshesi, halyqaralyq jáne respýblıkalyq kórmelerge qatysqan almatylyq qylqalam sheberi Maksım Vedernıkovtiń aıtýynsha, lotos alqaby – týrıstik brendke suranyp turǵan meken.
«Qazaqstanda týrısterdi qyzyqtyratyn tabıǵı oryndar kóp. Biraq sý ústinde ósip turǵan lotos sekildi alqapty alǵash ret kórdim. Shyn máninde sý betindegi sulýlyqty kózben kórý kerek», deıdi Maksım Vedernıkov.
Qyzylordalyq sýretshi Dýlat Aıtbaev Sh.Sarıev atyndaǵy kórkemsýret jáne qoldanbaly sándik óner mýzeıine erekshe týyndysyn usyndy. Ol lotos gúlin salýǵa kúrishti paıdalanǵan. Planerge qatysqan sýretshiler lotos alqabyn beınelegen 21 týyndysyn mýzeıdiń qoryna tapsyrdy. Al sýretshilerge 250 myń teńgeniń stıpendııasy berildi.