Májilis depýtaty Janarbek Áshimjan Eńbekshiqazaq aýdanyna kelgen issaparyn muǵalimdermen kezdesýden bastady. Saıajaı mańyndaǵy Rahat №1 orta mekteptiń ustazdarymen júzdesken «Amanat» partııasy fraksııasynyń múshesi erkin formatta ashyq áńgime tıegin aǵytty.
Muǵalimder birinshi kezekte saıajaıǵa aýyl mártebesin berip, ınfraqurylym júrgizý máselesin kóterdi. Depýtattyń aıtýynsha, bul másele respýblıka kóleminde kóterilip, Májiliste qaralýda eken.
Aýdandyq bilim bóliminiń basshysy Jarqyn Nurǵalymov balalardy tasymaldap oqytýǵa da osy saıajaı mártebesi kedergi keltiretinin ashyq aıtty. Sebebi, zańda mektep joq eldi mekenderden balalardy tasymaldaýǵa qarjy bólinedi. Al zań júzinde saıajaılarda eldi meken mártebesi joq. Soǵan qaramastan bilim bólimi zańdy belshesinen basyp, saıajaı balalaryn bilim oshaqtaryna tasymaldaıdy. Sol úshin zań qadaǵalaýshy organdar bilim bólimine aıyppul da salǵanyn jasyryp qalmady. Saıajaılyqtardyń ózekti máselesine qulaq asqan májilismen bul túıitkildi ońtaıly sheshý joldary qarastyrylyp jatqanyn jetkizdi.
Sonymen qatar depýtat saıajaı irgesindegi 900 oryndyq mekteptiń qurylysymen tanysty. Merdiger mekeme – «Bazis Construction» JShS, tapsyrys berýshi – Bolat О́temuratov atyndaǵy qor.
«Jalpy somasy 7 mlrd teńge bolatyn bilim oshaǵy zaman talabyna saı qural-jabdyqtarmen qamtamasyz etiledi. Qurylys jumysyna biz tolyqtaı otandyq ónimderdi qoldanyp jatyrmyz. Nysannyń qurylys deńgeıin apta saıyn jergilikti halyq qalaýlylary baqylaıdy. Ǵımarat keler jyldyń sońyna qaraı tolyǵymen paıdalanýǵa beriledi», dedi merdiger mekemeniń ókilderi.
Qurylys jumysyn aralap kórgen májilismen birqatar máselege nazar aýdardy. «Merdigerler mektepti ýaqytynda aıaqtaýǵa tıis», dedi J.Áshimjan.
Búginde №1 Rahat orta mektebine oqýshylar syımaı álek. Onyń ústine 1 500-ge jýyq saıajaılyq balalar Esik qalasyna tasymaldanady. Atalǵan mektep paıdalanýǵa berilse, birneshe másele oń sheshimin tappaq.
Qazirgi tańda saıajaı mańynda zaman talabyna saı taǵy bir bilim oshaǵy boı kóterip keledi. Jalpy quny 5 mlrd teńge bolatyn 1 475 oqýshyǵa arnalǵan orta mektep qurylysy júrgizilip jatyr. Jeke ınvestordyń qarjysyna salynyp jatqan mektep osy jyldyń jeltoqsan aıynda paıdalanýǵa beriledi dep josparlanyp otyr.
Qurylys barysymen tanysqan depýtat merdiger mekeme «Kapital construction» JShS-niń ókilderine qurylys sapasyna basa nazar aýdarýdy tapsyrdy. О́z kezeginde merdiger qurylys barysynda týyndap jatqan qıyndyqtardy da aıtyp ótti. Sózine súıensek, ǵımaratqa aýyz sý, kógildir otyn tartý men káriz júıesine qosylý qıyndyq týdyryp otyr. Sý men gazdy Esik qalasynyń tómengi jaǵynan alý kerek. Atalǵan jumystarǵa qosymsha 280 mln teńgege jýyq qarjy jumsalady.
Sapar sońynda májilismen Esik qalasyndaǵy 1 500 oryndyq mektepke arnaıy at basyn burdy. Búgingi tańda oqý ordasynyń qurylys jumystary aıaqtalǵan. Merdiger mekeme «BI Global» JShS-niń ókilderi jańa oqý jylynda paıdalanýǵa beriletinin aıtty.
Bilim bólimi basshysynyń aıtýynsha, mektep paıdalanýǵa berilse, Esik qalasyndaǵy 3 aýysymda bilim beretin mektepterdiń máselesi tolyǵymen sheshiledi.
Almaty oblysy qurylys basqarmasynyń tapsyrysymen salynyp jatqan bilim ordasynyń qurylysyna 5 mlrd 700 mln teńgeden astam qarjy bólingen.
Almaty oblysy