Májilis depýtaty Edil Jańbyrshın Mańǵystaý oblysy Qaraqııa aýdanynda eginmen aınalysatyn sharýa qojalyqtary ıelerimen kezdesti, dep habarlaıdy Egemen.kz parlam.kz-ke silteme jasap.
Qaraqııa aýdanynda 416 sharýashylyq bolsa, onyń 41-i eginmen aınalysady. Mańǵystaýlyq eginshiler bárin ósirýge daıyn, tek memleketten qoldaý kerek deıdi. Búgingi kezdesýge kelgen eginshiler osyndaı usynystaryn jetkizdi.
Egin sharýashylyǵynda tamshylatyp sýarý ádisine sýbsıdııa qarastyrylǵan. Alaıda qaraqııalyq dıqandar ony almaǵan. Egin ósirý úshin qunarly jer, tushy sý, elektr energııasy jáne túrli tyńaıtqysh kerek. Eginshiler osyǵan da sýbsıdııa bólýdi surap otyr.
«Turaqty ónimdi ótkizetin jer joq. Dıqandardan arzan baǵada alyp, qymbatqa satady. О́tpeı qalsa, shirigen jemisti qaıta tapsyrady. Odan bizge ne paıda? 20-30 teńge qossa, halyqqa da paıda ári jyldam óter edi. Eginmen aınalysý ońaı sharýa emes. О́zderi egedi, ózderi teredi. Egin sharýashylyǵyna eshkim kelgisi kelmeıdi. Jumys kúshi máselesi de ózekti bolyp otyr», deıdi dıqan Baýyrjan Týlepov.
Qaraqııalyq dıqandar jemis-jıdekter men kókónister ósiredi. Bul oraıda olar osy salaǵa qoldaýdy arttyrsa degen nıette.
«Azyq-túliktiń 70-80 paıyzy syrttan keledi. Soǵan qaramastan dıqandar Qaraqııa aýdanynda egin egip, túrli ónim alyp otyr. Olardyń usynys-pikirlerin, ýájderin tyńdap, máselelerin kózben kórdik. Endi sheshý joldaryn birge qarastyramyz», dedi E.Jańbyrshın.