Ortalyq kommýnıkasııalar qyzmeti alańynda ótken baspasóz konferensııasynda Eńbek jáne halyqty áleýmettik qorǵaý mınıstrliginiń Kóshi-qon komıtetiniń tóraǵasy Asqarbek Ertaev Ishki kóshi-qon úrdisterin retteý úshin qandaı is-sharalar qabyldanyp jatqanyn aıtyp berdi, dep habarlaıdy Egemen.kz OKQ baspasóz qyzmetine silteme jasap.
A.Ertaevtyń aıtýynsha, Úkimet qaýlysymen qandastardy, sondaı-aq eldiń ońtústik óńirlerden ishki mıgranttardy qonystandyrýǵa basymdyq beriletin eldiń 8 óńiri aıqyndalǵan. Bul negizinen Qazaqstannyń soltústik jáne shyǵys óńirleri.
«Bıyl biz ishki kóshi-qondy retteýdiń jańa tetikterin engizip jatyrmyz. Máselen, soltústik óńirlerdiń jergilikti atqarýshy organdarynda qonys aýdarýshylarǵa kómek kórsetýge, olardy qyzyqtyratyn barlyq máseleler boıynsha keńes berýge arnalǵan Beıimdeý jáne kóshi-qon ortalyqtary quryldy. Sonymen qatar bıylǵy jyldan bastap qonys aýdarýshylarǵa ekonomıkalyq utqyrlyq sertıfıkaty beriledi. Bul mıgranttarǵa aýyldarda, monoqalalarda turaqtap qalýǵa múmkindik beretin quraldardyń biri. Sertıfıkat mıgrantqa daıyn turǵyn úıdi tańdaýǵa nemese jańasyn salýǵa múmkindik beredi. Sertıfıkat turǵyn úı qunynyń 50%-yn jabady, biraq soma 4 mln teńgeden aspaýǵa tıis», dedi Kóshi-qon komıtetiniń basshysy.
Bul oraıda osy kúnderi 245 otbasy osyndaı sertıfıkattarǵa ıe bolǵan, jalpy, osy maqsattarǵa bıylǵy jyly 10 mlrd teńge bólingen.