Premer-mınıstr Álıhan Smaıylov Ishki ister mınıstrliginde bolyp, qylmystyń aldyn alý men olardy ashýda zamanaýı tehnologııalardy qoldaný, jalpy polısııa jumysyn sıfrlandyrý barysymen jáne jańa oqý jyly qarsańynda mektepterdegi qaýipsizdikti qamtamasyz etý sharalarymen tanysty, dep habarlaıdy Egemen.kz Úkimettiń baspasóz qyzmetine silteme jasap.
Vedomstvo basshysy Marat Ahmetjanov polısııanyń kúndelikti qyzmetinde zamanaýı tehnologııalardy keńinen qoldaný – Memleket basshysynyń ishki ister organdarynyń aldyna qoıǵan basty mindetterdiń biri ekenin atap ótti.
Atap aıtqanda, Ishki ister mınıstrligi respýblıkadaǵy qalalardyń kósheleri men qoǵamdyq oryndarynda «tolyq qamtý» prınsıpimen beınebaqylaýlar engizýde. Jyl basynan beri polısııanyń jedel basqarý ortalyqtaryndaǵy (JBO) beınekameralar arqyly 6 myń qylmys ashyldy, 2,7 mln jol erejesin buzý, sondaı-aq 312 myń basqa da ákimshilik quqyq buzýshylyq anyqtaldy. Nátıjesinde, bıyl elimizdegi qylmys kórsetkishi 17%-ǵa tómendegen.
«Sıfrlandyrý arqyly tıisti memlekettik qyzmetter jumysynyń tıimdiligin arttyrýǵa bolatynyna talaı ret kózimiz jetti. Nátıjesinde, eńbek ónimdiligi artyp, jemqorlyq faktileri azaıýda. Sıfrlyq tehnologııalardy engizý arqyly Ishki ister mınıstrligi de jaqsy nátıjelerge qol jetkizip otyr. Endi muny aımaqtarda odan ári kezeń-kezeńimen júzege asyrý qajet», dedi Álıhan Smaıylov.
Budan bólek, Úkimet basshysy mektepterdegi qaýipsizdikti qamtamasyz etý jumystarymen tanysty. Atap aıtqanda, oqý oryndarynda ornatylǵan beınekameralardaǵy jazbalar men dabyl túımesheleriniń sıgnaldaryn jedel basqarý ortalyqtaryna jáne polısııanyń kezekshi bólimshelerine shyǵarý barysy kórsetildi. Búginde mundaı sharalarmen 3 654 mektep qamtylǵan, beınebaqylaý kameralary 7 600 mektepte ornatylǵan. Olardy qosý jumystary jalǵasyp jatyr.
Sonymen qatar ishki ister organdarynyń mekemeleri de jappaı beınebaqylaýmen qamtylǵan. Barlyǵy 18 myń kamera ornatylǵan. Bul qyzmetkerlerdiń jáne jumys prosesine basqa da qatysýshylardyń is-áreketin baqylaýǵa múmkindik beredi. Dál osyndaı jumystar qylmystyq-atqarý júıesi mekemelerinde de júrgizilýde. Atap aıtqanda, 52 kolonııaǵa 22 myń beınekamera ornatylǵan. Beınebaqylaýdy Qylmystyq-atqarý júıesi komıtetiniń sıtýasııalyq ortalyǵy men prokýratýra organdary júrgizedi.
Budan bólek, Úkimet basshysy «Sıfrlyq polıseı» jobasy aıasynda satyp alynǵan jańa beınejetondardyń jumysyn baǵalady. Qurylǵy vıdeony basshylar men basqa da tekserýshilerdiń jumys oryndaryna onlaın rejımde translıasııalaıdy. Beınejetondarǵa ornatylǵan baǵdarlama polısııa qyzmetkerine beınejazbalardy óz betinshe joıýǵa, qurylǵyny óshirýge nemese óziniń otyrǵan jerin jasyrýǵa múmkindik bermeıdi.
Sondaı-aq Premer-mınıstrge polısııaǵa jol erejesin buzǵandardy anyqtaýǵa kómektesetin «Qorǵaý» júıesiniń erekshelikteri týraly baıandaldy. Baǵdarlama kóshe kameralarynan alynǵan derekterdi taldaı otyryp, jaqyn mańdaǵy polısııa qyzmetkeriniń planshetine qaýipti júrgizýshiniń kele jatqany týraly sıgnal beredi. Bul jol qozǵalysy erejelerin qasaqana buzýshy, ıa joǵary jyldamdyqpen kele jatqan kólik júrgizýshisi de bolýy múmkin.
Álıhan Smaıylov turmystyq zorlyq-zombylyq úshin jaýapkershilikti kúsheıtý sharalaryn júzege asyrý barysymen, kóshi-qon salasyndaǵy memlekettik qyzmetterdi kórsetý jumystarynyń nátıjesimen jáne CyberPol ınternet-alaıaqtyqpen kúres jónindegi jobamen tanysty. Atap aıtqanda, polısııa baılanys operatorlarymen birlese otyryp, jalǵan nómirlerden keletin qońyraýlarǵa tehnıkalyq tosqaýyl qoıady, nátıjesinde, búgingi kúni alaıaqtardyń 36,5 mln qońyraýyna tosqaýyl qoıyldy.
Esirtki qylmysymen kúres boıynsha, bıyl quqyq qorǵaý jáne arnaıy organdar 14 tonnadan astam esirtki tárkiledi, onyń ishinde 71 keliden astamy geroın jáne 652 kelisi «sıntetıka». Quny 24 mlrd teńge bolatyn 4,7 mln bir rettik doza aınalymǵa jiberilmedi. 52 esirtki zerthanasy joıyldy. Sondaı-aq 85 tonna prekýrsor tárkilenip, nátıjesinde 20 mln bir rettik «sıntetıka» óndirisine tosqaýyl qoıyldy. 2,5 myń esirtki saıty buǵattaldy.
Sonymen qatar kadrlyq prosesterdi avtomattandyrý qorytyndysy, jedel-qyzmet, qoǵamdyq tártipti qamtamasyz etý jáne jalpy quqyq buzýshylyqtyń aldyn alý boıynsha ózekti máseleler qaraldy.