Bilim kúni qarsańynda Qyzylorda qalasyndaǵy eki irgeli mekteptiń janynan salynǵan qosymsha ǵımarattar paıdalanýǵa berildi, saltanatty ashylý rásimderine oblys ákimi Nurlybek Nálibaev qatysty, dep habarlaıdy Egemen.kz atalǵan oblys ákimdiginiń baspasóz qyzmetine silteme jasap.
«Ult ustazy Ahmet Baıtursynulynyń «Quralsyz is istelmeıdi həm qural qandaı bolsa, istegen is te sondaı bolmaqshy. Istiń tolyq jaqsy bolýyna mektep saıly həm jaqsy bolýy shart» degen sózi balany oqytýǵa, eń birinshi jaıly da zamanaýı mekteptiń keregin eske salady. Búgin biz osyndaı jaıly da jańa ǵımarattyń ashylýynyń kýási bolamyz. Bala sanynyń jyl sanap artýyna baılanysty birneshe bilim oshaǵy qosymsha qurylysty qajet etti. О́zderińiz biletindeı, ortalyqta jańa mektep salý úshin jer telimi tabylmaıdy. Qala syrtyna salynǵan mektepke qatynaý ata-anaǵa da, balaǵa da aıtarlyqtaı qıyndyq týǵyzady. Qosymsha ǵımarat salýdyń taǵy bir tıimdi tusy – bıýdjet qarjysy únemdeledi, jańa mektepke qaraǵanda arzanǵa túsedi. Eń mańyzdysy balalar ózderi úırengen, úıine jaqyn mektebine qatynaıdy. Sondyqtan bárine birdeı ońtaıly sheshimge, ıaǵnı úsh aýysymmen oqıtyn mektepter aýlasyna qosymsha ǵımarat salýǵa toqtaldyq», dedi aımaq basshysy N.Nálibaev.
№101 mektep-lıseı aýlasynda salynǵan 375 oryndyq ǵımaratta bastaýysh synyptar oqıtyn bolady. Al Abaı atyndaǵy úsh tilde oqytatyn daryndy balalarǵa arnalǵan mamandandyrylǵan synyptary bar mektepke 550 oryndyq qosymsha ǵımarat salyndy.
Jańa ǵımarattarda oqý kabınetteri, shyǵarmashylyq bólmeler talapqa saı jasaqtalǵan. Oqýshylarǵa yńǵaıly bolý úshin oqý quraldaryn saqtaýǵa, balalardyń shyǵarmashylyq damýy men demalýyna tolyq jaǵdaı qarastyrylǵan. Beınebaqylaý, dybystyq habarlaý jáne basqa da kúsheıtilgen qaýipsizdik jabdyqtary ornatylǵan.
Oblys ortalyǵyndaǵy 4 mekteptiń (№2,3,101,264) 1 850 balaǵa arnalǵan qosymsha ǵımarattary jańa oqý jylynda balalardy qabyldaıdy.