Jańa oqý jylynda 55 myń oqýshyǵa arnalǵan 39 jańa mektep ashylady. 2023 jyldyń sońyna deıin barlyǵy 132 myń oryndyq bilim berý uıymdaryn paıdalanýǵa berý josparlanyp otyr. Bul týraly Oqý-aǵartý mınıstrliginiń baspasóz qyzmeti habarlady, dep jazady Egemen.kz.
Búginde 194 bilim berý uıymynda kúrdeli jóndeý jumystary aıaqtalady. Memleket basshysy Qasym-Jomart Toqaevtyń tapsyrmasy boıynsha jyl sońyna deıin shaǵyn qalalarda, aýdan ortalyqtarynda jáne aýyldarda ornalasqan 1 000 mektep alty baǵyt boıynsha jańǵyrtýdan ótedi: kúrdeli jáne aǵymdaǵy jóndeý, pán kabınetterin jabdyqtaý, mektep jıhazdaryn, kitaphanalardy, ashanalardy jańartý, sondaı-aq balalardyń qaýipsizdigin qamtamasyz etý. Oǵan qosa 1 000 pándik kabınet ashý josparlanyp otyr, sondaı-aq qosymsha 749 pándik kabınet satyp alynady.
Bilim berý ınfraqurylymyn qoldaý qorynyń arqasynda 1 qyrkúıekke deıin 25 myń oryndyq 13 mektep, sondaı-aq jergilikti bıýdjet jáne jeke ınvestısııa esebinen 30 myń oryndyq 26 mektep ashylady.
Aıta ketsek, Qazaqstanda «Jaıly mektep» ulttyq jobasy bastaý aldy. Joba sheńberinde 740 myń oqýshyǵa arnalǵan 369 mektep salý kózdelip otyr.
Memleket jyl saıyn mektepterdiń qurylysy men jańǵyrtý jumystaryna qarjy bólip keletinin de aıta ketý kerek. Máselen, sońǵy úsh jyl ishinde 340 myń oryndyq 626 mektep paıdalanýǵa berildi.