Bilim kúnine oraı elimizde 39 jańa mektep esigin aıqara ashty. Oqý-aǵartý mınıstrliginiń habarlaýynsha, jańadan ashylǵan oqý ordalary 55 myń oqýshyǵa arnalǵan. Al jyl sońyna deıin barlyǵy 132 myń oryndyq bilim berý uıymdaryn paıdalanýǵa berý josparlanyp otyr.
Mınıstrliktiń málimetinshe, Bilim kúni paıdalanýǵa berilgen 25 myń oryndyq 13 mektep Bilim berý ınfraqurylymyn qoldaý qorynyń demeýshiligimen, al 30 myń oryndyq 26 mektep jergilikti bıýdjet jáne jeke ınvestısııa esebinen salyndy. Buǵan qosa «Jaıly mektep» ulttyq jobasy júzege asyrylyp jatyr. Atalǵan jobanyń aıasynda 740 myń oqýshyǵa arnalǵan 369 mektep salý josparlanǵan.
– Bıyl 130 myńnan astam oqýshy sý jańa mektepte oqýdy bastaıdy. Aýyldyq jerlerdegi bilim deńgeıin damytýǵa da erekshe kóńil bólinip otyr. Osy jyly 1 myń aýyl mektebi qaıta jańǵyrtylyp, pándik kabınetter ashylady, kitaphanalar men ashanalary, jıhazdary jańartylady. Alǵash ret aýyl mektepteri arasynda respýblıkalyq olımpıada uıymdastyrylady. Munyń bári otandyq bilim sapasyn arttyrý úshin, balalarǵa qaýipsiz ári qolaıly jaǵdaı jasaý maqsatynda qolǵa alyndy, – dedi Qosshy qalasyndaǵy mektep-gımnazııanyń ashylýyna qatysqan Oqý-aǵartý mınıstri Ǵanı Beısembaev.
Mınıstrliktiń aqparatyna súıensek, elimizde jańadan salynyp, bilim merekesinde paıdalanýǵa berilgen 39 mektepke qosymsha taǵy 194 bilim berý uıymynda kúrdeli jóndeý jumysy aıaqtaldy. Memleket basshysynyń tapsyrmasy boıynsha jyl sońyna deıin shaǵyn qalalarda, aýdan ortalyqtarynda, aýyldarda ornalasqan 1 000 mektep alty baǵyt boıynsha jańǵyrtýdan ótedi. Iаǵnı kúrdeli jóndeý, pán kabınetterin jabdyqtaý, mektep jıhazdaryn, kitaphanalardy, ashanalardy jańartý, sondaı-aq balalardyń qaýipsizdigin qamtamasyz etý jumystary júrgiziledi. 1 000 pándik kabınet ashylmaq, sonymen qatar taǵy 749 pándik kabınet satyp alynady.
Aıta keterligi, memleket jyl saıyn mektepterdiń qurylysy men jańǵyrtý jumystaryna qarjy bólip keledi. Sońǵy úsh jyl ishinde 340 myń oryndyq 626 mektep paıdalanýǵa berildi.